أشيك سباك فى مصر: معنديش فيس بوك ولا واتس آب وأغلى بدلة اشترتها بـ1500 جنيه

وجه حسن كامل الشهير بـ"أشيك سباك فى مصر" رسالة إلى الشباب وقال "اشتغلوا واعملوا عمل ينفع المجتمع وينفع بلدكم، ومحدش يقول الشغلانة ديه مش مناسبة ليا، أى شغلانة شريفة كويسة، لحد ما تبقى تلاقى الشغلانة المناسبة ليك".

وأضاف عم حسن، خلال لقائه بتليفزيون اليوم السابع حول الشباب "الكسول" المنتظر الوظيفية وهو بالبيت، "اشتغل أى حاجة بسيطة لحد ما رنا يكرمك باللى أنت عايزه لكن ماتقعدش كده، فيه ناس مشاهير كتير اشتغلو ف شغلانات بسيطة قبل ما يشتهروا، لازم تنفع بلدك وأهلك، وأبدأ بأى شغل طالما شريف".

وفى رده على سؤال ما تمناه من أنه يعمل بالعاصمة الإدارية الجديدة قال عم حسن "كنت أتمنى ده عشان أحفادى يتذكرونى بعد ما أموت ويقولو أنى ساهمت بجهد متواضع فى هذا المشروع الضخم".

وخلال لقائه حكى عم حسن عن حياته وحبه لمهنة السباكة، وقال "حصلت على الابتدائية القديمة، وكان نفسي أكمل تعليمى لكن الظروف منعتنى وقتها، ولكننى أحب هواية القراءة منذ صغرى، وقرأت روايات عديدة لكتاب عرب وروايات مترجمة ولدى مكتبة كبيرة بمنزلي".

وتابع عم حسن، لو كان الله أراد لى أن أكمل تعليمى كنت أتمنى أن أعمل فى مجال الإعلام، كى أكشف للناس الحقيقة وأساهم فى معرفتهم ووعيهم، وشدد على أن أولاده يفتخرون به دائما، وقال "عندى ابن و4 بنات، ابنى اتجوز زميلته فى الجامعة وأنا بحبها واحترمها زى بناتى بالضبط، ابنى بيشتغل فى مجال الكمبيوتر، وكان هو شاب بيشتغل معايا لكن بعد ما اتخرج اشتغل فى مجال الكمبيوتر".

وعن المختلف فى المهنة زمان وحاليا قال، الهدف والاستراتيجية واحدة، الخامات هى اللى اختلفت، زمان كنا بنشتغل بالحديد والرصاص والمواسير النهاردة الخامات بقت بلاستيك"، وعن أغلى بدلة اشتراها قال "أغلى بدلة تقريبا كانت بـ1500 جنيه، وأغلى حذاء كان تقريبا بـ 400 جنيه حذاء"، وعن علاقته بالتكونولوجيا أجاب "معنديش لا فيس بوك ولا واتس آب".