بهيرة منتصر بعد احتفالها بطلاقها لـ"تليفزيون اليوم السابع ": هعيش حياتى من النهارده

قدم تليفزيون اليوم السابع تغطية خاصة عن بهيرة منتصر السيدة التى أثارت جدلا كبيرا على السوشيال ميديا، بعد احتفالها بطلاقها من زوجها، من إعداد سما سعيد وتقديم حور محمد.

النجاح والأفراح والترقيات هى المناسبات التي تقام من أجلها الحفلات المعتادة، إلا في حالة بهيرة منتصر صاحبة الـ20 عاما والتي قررت الاحتفال بطلاقها بوضع بالونات وتقديم الحلوى للمباركين لها من الصديقات والمقربات منها في حفل أقامته داخل منزلها، وقالت بهيرة في حديثها لـ"اليوم السابع"، إن الحفل جاء مباشرة بعد حصولها على الطلاق، التي قالت إنه كانت نتيجة طبيعية للخيانة المستمرة، وتابعت: "كان حب الطفولة واتخطبنا وأنا 17 سنة، ومتجوزين من سنتين وعندي ولد اسمه زين عنده 7 شهور"، وأضافت: "بشتغل في الميديا، الخيانة كانت على فترات بس فضل زي ما هو متغيرش".

وفى بداية حديثها عن المشكلة لتليفزيون اليوم السابع قالت بهيرة: "أنا اتجوزت 18 سنة عن حب كبير وعيش وملح، وخلال سنتين جواز لقيت الشخص نفسه مش ده الشخص اللى اتعرفت عليه أصلا.. هو كان ابن الجيران.. اتجوزت سنتين وخلفت.. وعلى قد ما في أيام حلوة على قد ما كنتا بحس أنه مش ده الشخص اللى اختارته.. لكن للأسف عرفت الكلام ده بعد الجواز".

وعن أسباب انفصالها قالت بهيرة: "كنت كل مرة بستحمل معاملة من تدخلات ناس كتير في حياتنا من بنات كتير بيكلمهم وبيقول إنهم صحابه.. كان متعددهم.. مفيش كده.. وآخر حاجة وصلتى شوفت شات اتبعتلى وشوفت حاجات مستحملتهاش.. في كام راجل في العالم أكيد هو مش آخر واحد ولا أنا آخر واحدة.. أنا خدت قرار الانفصال بعد سنة وخمس شهور من جوازنا وكتير كلمته حتى قبل طلاقنا بيومين".

وأردفت: "حاولت استحمل عشان ابني كتير لكن كل مرة مكنتش بقدر لحد ما في يوم حصل خناقة بسيط وسيب البيت، وعرفت وقتها أنه كرر نفس الخيانة وده اللي مقدرتش استحمله".

وتابعت: "تنازلت عن جميع حقوقى مقابل الطلاق"، هكذا قالت بهيرة والتي عبرت عن شعورها بأنها لن تقدر على العيش طوال الوقت محاطة بالقلق والتوتر من الغدر والخيانة، مضيفة: "بشتغل ومحتفظة بابني معي، حياتي هتبقى أفضل ولو زعلت على حاجة فأنا زعلانة عشان العشرة والعيش والملح اللي كان بينا".

وعن إقامتها حفلا للطلاق قالت: "عملت حفلة بجد عشان كنت مبسوطة أني قدرت أقف على رجلي، واعمل حاجة توقف الأذى النفسي اللي كنت بعيشه وأنا صغيرة وابني معي، وعزمت صحابي وعملت سيشن وكنت مبسوطة".

وعن رد فعل الأهل والأقارب على إقامتها حفل طلاقها قالت بهيرة: "اعتبروني بهزر أو مجنونة، وفيه منهم محضروش الحفلة على أساس أني مش هعملها".

واختتمت: "ربنا بيدي القوة قد الحمل، أنا حبيت أفرح نفسي بعد حزن وتعب، وأتمنى إن ربنا يقويني على اللي جاي وأقدر أربي ابني كويس ويطلع زي ما بتمنى".