فيديو.. الرئيس السيسى لعمرو أديب: الشرائح الأولى المستهدفة للقاح كورونا 35 مليونا.. ويطمئن المصريين بشأن سد النهضة: نقاتل بالتفاوض وبثباتنا هنوصل لنتيجة.. أزمة عقارى الإسكندرية وفيصل تجسيد للواقع

الرئيس السيسى لـ "عمرو أديب": قوة مصر نابعة من مؤسساتها وشعبها

قال الرئيس عبد الفتاح السيسى، أن أزمة العقار المائل فى محافظة الإسكندرية، تجسد الواقع، متابعا: "القضية حجمها كبير.. والواقع بتاع العمارة دى وعمارة فيصل تجسيد للواقع اللى إحنا فيه".

وأضاف الرئيس عبد الفتاح السيسى، فى مداخلة هاتفية لبرنامج "الحكاية" مع الإعلامى عمرو أديب،"لما أطلقت موضوع المصالحة ومخالفات البناء كان الهدف منه.. إحنا بنقول للناس فيه عندنا مشكلة كبيرة جدا، والمشكلة دى من ضمنها أن الدولة غايبة من سنين طويلة.. وهذا يعنى إجراءات غير مسيطر عليها".

وأشار الرئيس السيسى، إلى وجود فساد إدارى وتنظيمى أدى إلى ظهور مثل هذه المشكلات فى الدولة المصرية، مردفا: "أنت النهارده عايز مليون شقة سنويا.. وعايز توفر ده فى ظل قدرة مالية محددة".

وقال الرئيس عبد الفتاح السيسى: أن موضوع التطعيم واللقاح موضوع مهم، وبندرس كل الموضوعات علشان ناخد القرار ونشوف هناخد مين الشرائح اللى هناخدها بالترتيب بتاعها، ولقينا عندنا الشرائح الأولى الأطباء وأصحاب الأمراض المزمنة 35 مليونا، فلوسهم موجودة مفيش مشكلة ولابد من السيطرة على الموضوع.

وأضاف: "عاوز الناس تطمئن، الجائحة مسيطرة على الدنيا كلها، وأنا عاوز أطمن الناس حاجتنا بتيجى وحاليا شغالين على الأطقم الطبية، وفى ناس بتقول مش عاوزة وحجم الطلب من 40 إلى 50 %".

وأكمل الرئيس عبد الفتاح السيسى: "إحنا داخلين على القرى ومخصصين 500 مليار جنيه للقرى، كم المطلوب ضخم والبلد مش قادرة توفره، مش المشكلة توفير المبلغ المشكلة فى الرسوم الهندسية، كل قرية ليها شغل مختلف، أنا بستفيد من فرصة البيت بتاع الإسكندرية احنا دارسين حاجتنا ومجهزين نفسنا، عندنا 100 ألف أو 200 ألف مخالفة فى الإسكندرية ومحتاجين مليون شقة، محتاج 3 إلى 4 تريليون جنيه".

وأضاف: "أنا أقدر أعمل لكل الأجيال القادمة كل ده، مليون شقة، نحن تجاوزنا موضوع الإيجار كفكر، الناس عاوزة تعيش فى تمليك، وما قلته عن المساكن قولته قبل كده عندنا 40 إلى 50 % عشوائيات، اليوم إحنا داخلين على الريف، المشكلة مش مشكلة توفير التمويل اللازم، فهل إحنا هننجح ونحن متحركين فى إننا نقلل حجم النمو العشوائى، حجم الطلب اللى هينطلب السنادى والسنة الجاية احنا قادرين نوفره".

وحذر الرئيس عبد الفتاح السيسى، من ظاهرة الزيادة السكانية، وقال فى حديثه للمصريين: "انتوا يا ترى منتبهين لكلامى عن النمو السكانى ليكم ولا لاء؟.. إحنا مع بعض نواجه مشكلة كبيرة.. لا أنا لوحدى.. ولا انتو لوحدكم.. إحنا مع بعض نستطيع".

وأضاف الرئيس السيسى، أن قضية الزيادة السكانية منذ أيام الرئيس الراحل جمال عبد الناصر، واستمرت فى عهد الرئيسين الراحلين أنور السادات ومحمد حسنى مبارك، مردفا: "الواحد يقول أنا عندى 4 عيال مش عارف أكلهم.. صحيح أنت مش عارف تأكلهم.. طيب انتبهت وأنت بتجيب الـ4 عيال؟".

وتابع الرئيس السيسى،"لازم وإحنا بنشتغل كدولة نخلى بالنا من استقرار المجتمع.. ومش كل حاجة يتم تطبيقها مباشرة، ممكن تعمل إجراء نظرى صح لكن توقيت تطبيقه يمنع".

وأكد الرئيس السيسى، أن هناك اهتمام كبير بقضية تنظيم الأسرة خلال هذه الفترة، متابعا: "مينفعش نعمل إجراءات قانونية عنيفة دلوقتى.. تأثيرات الثورة والغضب ما زال موجود جوه الناس لحد الآن.. لم ينتهى بعد.. ولكن يجب على الناس تساعدنا إنها تتفهم أسباب ما نحن فين وإحنا ليه وصلنا لكده".

قال الرئيس عبد الفتاح السيسى، أن قوة مصر نابعة من مؤسساتها وشعبها وليس من مؤسساتها فقط، ونحن حريصون على أن تكون كل تحركاتنا تهدف إلى بناء السلام والاستقرار".

وأضاف الرئيس السيسى، الأوضاع الخارجية دائما مرتبطة بالأوضاع الداخلية والقرارات نابعة من الشعب ومن يستهدف فهو يستهدف الشعب ولا يستهدفنى، وكل الفكرة اجتزاء الحقائق".

وطمأن الرئيس عبد الفتاح السيسى، المصريين بسبب تخوفهم من أزمة سد النهضة ومخاوف إضراره بالمياه فى السنوات المقبلة، قائلا: "نحن نقاتل بالتفاوض، طول ما إيدينا فى إيد بعض وثابتين ما نقلقش من أى حاجة، وهنوصل لنتيجة بالتفاوض وبثباتنا كمصريين فى موضوع سد النهضة".

وبشأن انزعاج الناس من كثرة إنشاء الكبارى فى مصر، رد الرئيس السيسى، فى مداخلة هاتفية لبرنامج "الحكاية" الذى يقدمه الإعلامى عمرو أديب، قائلا: "أنا عايز أقول للناس هو انتو شايفين أن اللى إحنا بنعمل ده كان مطلوب ولا هو زيادة، انت عندك كام مليون عربية بتتحرك فى مصر، وكل سنة بتزيد 200 ألف، انتو متخيلين فقط هو أنا بعمل كتير فى الطرق بس، لا أنا بعمل كتير فى كل شىء فى كل القطاعات".

وتابع الرئيس قائلا: "قطاع الطرق ده مرتبط بحياتنا فى مصر، وعلشان نقلل حجم الوقت الضايع والوقود اللى بيستهلك ويضر الناس، واختتم مداخلته بالقول: "والله كله من فضل الله والحمد لله".