عمرو أديب: الأهلى قدم أداء عبقرى أمام البايرن.. ولو حد فكر إنه يحفل مش هيعرف

أشاد الإعلامى عمرو أديب، بأداء الأهلى أمام بايرن ميونخ الألمانى، فى نصف نهائى كأس العالم للأندية المقامة حاليا فى قطر، قائلا: "الأهلى قدم أداء عبقرى، والمفروض يتعمل تمثال لمحمد الشناوى".

أضاف عمرو أديب، ببرنامج "الحكاية": "المعروف عن بايرن ميونخ الأفضل فى العالم وفيها أعظم لاعيبة، إنها كل 3 هجمات يجي جول، ولكن أى حد بيفكر يحفل على الأهل مش هيعرف.. الأهلى كان واقف على رجليه وكان ند محترم فى هذه البطولة، وأنا بحيي النادى الأهلى ولاعيبته والأهم جمهور النادى الأهلى".

وأردف عمرو أديب: "أنت عملت اللى عليك.. الأهلى النهاردة شوطه التانى مش زي الشوط التانى مع الدحيل، أداء الأهلى النهاردة ممكن تقارنه بفرق بتلعب مع بايرن ميونخ فى الدورى الألمانى، والأهلى لو عنده مهاجم بيعرف يجري على الجول كان ممكن يحصل شئ"

وتابع عمرو أديب: "شكرا للنادى للأهلى.. قاموا بدورهم على أكمل وجه النهاردة أمام بايرن ميونخ، الروح كانت عالية وهي دي روح الفانلة الحمراء اللي نعرفها".