قضايا على طاولة التوك شو.. شقيقة الطبيب أحمد ماضى: تكريم الرئيس للجيش الأبيض أثلج صدرونا والبلد جميعا

ولاء ماضى شقيقة الدكتور أحمد ماضى

إبراهيم سعيد

الأربعاء، 10 مارس 2021 05:00 ص

تتناول برامج التوك شو، يوميا مجموعة من القضايا والموضوعات المهمة التى تخص الشأن الداخلى والقضايا العالمية، ونرصد أبرز ما جاء بها فى ما يلى:

بطلة مشهد إنقاذ طفلة المعادى تكشف تفاصيل الواقعة: "تخيلت بنتى فى موقف التحرش"

كشفت أوجيني أسامة بطلة مشهد إنقاذ طفلة المعادى، تفاصيل الواقعة، قائلة: "لما شوفته دخل وكان بيشاور مخدتش بالى، ولما لمحت البنت داخلة في حاجة في دماغى أتلغبطت ولقيته بيشدها، وفتحت الباب ومفكرتش غير إنى طلعت فجأة وواجهته وانفعلت عليه".

وأضافت، خلال مداخلة هاتفية ببرنامج "حديث القاهرة"، على فضائية "القاهرة والناس"، مع الإعلامى خيرى رمضان وكريمة عوض: "مصير البنت وخضتها وحالة الرعب هو اللى فكرت فيه، وتخيلت بنتى، أنا عندى بنت قدها وعندى ولد، وبقول له: بتعمل إيه في البنت؟، قال لى أنا مش بعمل فيها حاجة، وقلت له: شايفاك في الكاميرا بتعمل حاجة، وقال أنا مبعملش حاجة، ودا كل الحوار، ومقاليش أنها بنتى".

وتابعت: "خرجت تلقائى بدون أي تفكير ووقفت قدامه وحاولت أواجهه باللى حصل، ولما أنكر قلت له الكاميرا شافتك، وبص على الكاميرا ومشى، ومتوقعتش أنه يعمل كل ده، بس قلت أكيد في حد من سكان حى المعادى أو القسم هيشوفوه ويعرفوا يتصرفوا ومحطتش في دماغى ممكن يحصل كل ده".

وأشارت إلى أنها لم تحذف الفيديو من الفيس بوك، مردفة: "مشلتش البوست والصفحة اتقفلت والبوست اتشال لوحده".

واستطردت: "في النيابة طمنونى وقالولى أوعى تخافى وأنتى عملتى حاجة صح ومتندميش عليها، وأنا نشرت الفيديو على الفيس بوك وفي نفس اليوم بالليل تواصلت معايا الشرطة"، مؤكدة أنها لم تتعرض لأى ضغوط من أي نوع عقب نشر فيديو التحرش.

وفى مداخلة أخرى مع الإعلامية لميس الحديدى ببرنامج كلمة أخيرة على قناة ON، أضافت بطلة مشهد إنقاذ طفلة المعادى: "لما شاف الكاميرا جري على طول بسرعة.. أنا بشتغل في معمل تحاليل كنت في "ريسبشن" المعمل وشفت الموقف قدامي وكانت زميلتي في الغرفة الداخلية وأول ماشفت الموقف خرجت وهي جت ورايا".

وأكملت: "وقتها ماجاش حاجة في بالي غير الرهبة والخوف والموقف اللي كانت فيه البنت والحالة النفسية اللي ممكن تتعرضلها ومستقبلها كل الأفكار دي جت في بالي وأنا بفتح الباب عشان أنقذها".

وكشفت أنها أم ولديها ابناء أكبر من الطفلة المتحرش بها في الفيديو، قائلة: "ماستحملتش المنظر عشان تخيلت بنتي مكانها والأحداث كلها تمت في لحظة فتحت الباب وواجهته ولم أتردد لثانية واحدة في إيقافه ولم أتررد أن أبث الفيديو على السوشيال ميديا.. ربنا كان عاوز ينقذ الطفلة دي واتحركت بمشاعري مش بعقلي ومافكرتش لحظة واحدة وتعاملت بلتقائية، وأنا عندي بنت زيها وقلت أكيد ربنا هيوقف اللي عملته لاولادي لأني بنقذ أطفال وبنات أخريات".

وأكملت: "البنت كانت مرعوبة وأول مافتحت الباب هربت منه.. الطفلة دي بتبيع مناديل برفقة أسرتها في شارع مجاور وشفتها قبل كده مرة أو مرتين وعارفها بتبقى دائماً واقفة في ميدان الحرية".

وواصلت: "مكنتش مهتمة بالسوشيال في حياتي العادية لكني قررت بث الفيديو بنية الوصول للمتحرش والقبض عليه ولم أكن أتخيل سرعة انتشار الفيديو وضبط الرجل.. وأنا ماعنديش متابعين كتير على الفيسبوك غير أصحابي وقرايبي.. وبمجرد وصولي للبيت لقيت قسم المعادي بيكلمني، ولحد الصبح بيتواصل معانا واليوم كله بيدوروا على المتهم لحد ما قبضوا عليه ".

أكملت: أنا ماعرفش استدرجها إزاي؟، وفي تعليقها على تعليقات بعض رواد السوشيال ميديا المهاجمين لنشرها للفيديو قالت: شفت كافة التعليقات لكن أنا مقتنعة أنه عمله كذا مرة وربنا رفع ستره من عليه وده تدبير ربنا عشان يفضحه وينقذ بقية الأطفال".

ونفت أن يكون صاحب المعمل قد ضغط عليها لعدم نشر الفيديو قائلة: "بالعكس شجعني من أول لحظة رفع الفيديو وقالي اللي أنتي شايفاه مناسب جواكي اعمليه عشان ضميرك يستريح لـأن ربنا كتبله يتفضح هنا، وأنا مستغربة من اللي اتقال أنه ضغط عليا". وأوضحت أن أسرتها تخشى عليها لكنهم في ذات الوقت شجعوني، وقالولي "برافو" ولم يغضب أحد منهم.

شقيقة الطبيب أحمد ماضى: تكريم الرئيس للجيش الأبيض أثلج صدرونا والبلد جميعا

روى ولاء ماضى، تفاصيل رسالة شقيقة الدكتور أحمد ماضى، استشارى أمراض الرئة بمستشفى صدر المعمورة، والذى توفى متأثرًا بفيروس كورونا.

وقال ماضى، فى اتصال هاتفى ببرنامج "مساء dmc"، المُذاع عبر فضائية "dmc"، أن "أحمد" من الشخصيات الطيبة جدا وكان بشوشا ولم يتأخر فى خدمة الآخرين، ومن أوائل من انضموا لمستشفى عزل العجمى مطلع شهر مارس الماضى، كما أنه بشر المواطنين من خلال فيديو نشره بمحاصرة الفيروس.

وتابع: "ربنا كتب على إيده الشفاء لناس كتيرة، وعالج ناس كتيرة، أنا بشكر رئيس الجمهورية ووزير الدفاع ووزيرة الصحة على المجهود الجبار اللى اتعمل فى مستشفى صدر المعمورة".

وأكد شقيق الطبيب أحمد ماضى، أن تكريم الرئيس عبد الفتاح السيسى خلال الندوة التثقيفية الـ33 للشهداء القوات المسلحة، أثلج صدرونا والبلد جميعا.

ووصى الطيب أحمد ماضى قبل وفاته برسالة قائلا "أنا لم أقصر فى واجبى فى عملى بالطب ووطنى واذكرونى بكل خير".

والدة الشهيد سعيد حمدى: ابنى كان الوحيد ومش خسارة فى مصر

قالت فاطمة عبد الرؤوف، والدة الشهيد سعيد حمدى: "نحمد الله على كل شىء، وأن نجلها ليس خسارة فى مصر، وهو دائما كان يحب مصر.. وابنى مش وحيد.. ولاد مصر كلهم ولادى.. دم سعيد هو دم جورج.

وأضافت في مداخلة هاتفية مع برنامج "اليوم" المذاع على قناة "dmc"، ويقدمه الإعلامية سارة حازم: "بحمد ربنا على كل عطاياه.. سعيد كرمني في الدنيا وفي الجنة إن شاء الله.. هو كان ابني الوحيد.. ومش خسارة في مصر.. وكان دايما بيسعى في حب مصر، ويحب لقاء ربنا، علشان كدة ربنا اختاره، واختار له مكانة عالية.. وأنا بفتخر إنى أم الشهيد اللي ضحى عشان ابنه يعيش فى سلام".

وتابعت باكية: "هو كان كل حاجة حلوة، ونعم الابن، وبار بمصر، وإن شاء الله يسعد بالجنة، وهو خير أجناد الأرض، والحمد لله إنه ربنا أكرمني ببطل.. والحمد لله إنه تربية القوات المسلحة، وأنا أشكر كل القيادات والرئيس".