عمارات وسط البلد بعيون عاشق.. المصور الإيطالى كارمينيه كارتولانو لـ"اليوم السابع": شوارع المنطقة زى روما وباريس وتخيلت شكلها بالورد وصور نجوم الزمن الجميل.. مصر سحرتنى من 20 سنة وعشت بالمنيل وأتقن العامية

صور لعمارات وسط المدينة وقد زينتها الزهور والنباتات الخضراء تارة لتجعل من شكلها مبهرًا، أو نجوم الزمن الجميل تارة أخرى لتخليد ذكراهم، تلك الصور التي انتشرت على مواقع التواصل الاجتماعي، ولاقت استحسان كل من رآها، وبالبحث عنها اكتشفت "اليوم السابع" أن صاحبها مصور إيطالي يعشق أم الدنيا، إنه "كارمينيه كارتولانو" الذي قضى أكثر من 20 عامًا من عمره في مصر، وإليكم تفاصيل القصة.

أحد تصميمات كارمينيه كارتولانو

أحد شوارع وسط البلد

أحد ميادين وسط البلد

بلهجة مصرية واضحة قال المصور الإيطالي كارمينيه كارتولانو لـ "اليوم السابع": "أنا اتخرجت من جامعة في إيطاليا، درست فيها اللغة والأدب العربي، ودي كانت البداية، وجيت مصر من زمان سنة 1999، بس اهتمامي بوسط البلد بدأ لما جيت أسكن هنا، لأني في الأول كنت ساكن في المنيل."

المصور الإيطالي كارمينيه كارتولانو في قصر البارون

وأضاف "كارمينيه": "اللي بيلف في شوارع وسط البلد ما ينفعش ما يشوفش جمال المباني. بتحس إنك في شوارع روما أو باريس بس في نفس الوقت كل اللي حواليك مصري.. في اختلاط مميز وحلو، لدرجة إني بدأت أصور المباني اللي بشوفها كل يوم، وفي يوم جت في بالي فكرة الجرافيك، وعملت بيها معرض، وكده شهر عملت المشروع بالمباني والورد، كل ده من جمال وسط البلد."

تصميم كارمينيه كارتولانو لمباني وسط البلد بالزهور

تصميم للمصور الإيطالي كارمينيه كارتولانو

يستمتع "كارتولانو" بالتجول في وسط مدينة القاهرة، أو وسط البلد كما نطلق عليها، وبدون سبب يجد نفسه يسير في شوارعها دون هدف واضح، ويبدأ في متابعة تفاصيل المباني "التحفة" على حد وصفه، والاستمتاع بجمال المدينة.

تصميمات كارمينيه كارتولانو على المباني

تصميمات مباني وسط البلد من كارمينيه كارتولانو

"فيه ناس كتير بتسألني إيه سر حبك لمصر وليه اخترت تعيش فيها؟ بس الحقيقة إن مفيش سر ولا حاجة، اعتقد إن في مصر فيها سحر معين والواحد لو حبها مش هيعرف يسيبها، أنا بستمتع بالحياة هنا وكل يوم بكتشف حاجة جديدة." هكذا تحدث المصور عن سبب بقائه في مصر.

وأضاف أنه قام بتأليف كتاب، حكى خلاله الكثير من المواقف التي يواجهها أثناء حياته في مصر، لأنه يرى أن كل شخص تقابله ينتج عنه تصرف أو موقف يجعلك لا تنساه، ومعظمها تكون مضحكة.

حسين فهمي وميرفت أمين على أحد المباني

رجاء الجداوي على أحد مباني وسط الولد

رشدي أباظة على أحد المباني

ويرفض "كارمينيه كارتولانو" معاملته على كونه غريب عن البلد، وعن ذلك قال: "أنا مش بقول أنا والمصريين، ومش بحط نفسي والمصريين في مكان تاني، لكن أنا بتعامل كأني واحد من الشعب، وكأن مصر بلدي."

ويجد أن خفة الدم والطيبة هما أكثر ما يميز المواطن المصري، وأنهما أكثر صفتين وجدهما من خلال تعامله مع المصريين منذ قدومه للعيش بينهم، وقد يكون هذا من أسباب استقراره فيها.

وبالحديث عن تصميمات مباني وسط البلد قال: "أنا استخدمت نجوم السينما القديمة على المباني، بس ممكن تتحط صور لشخصيات مهمة في التاريخ المصري مثلًا أو أطباء أو علماء عامة، في البداية استخدمت نجوم من هوليوود، بس بعد كده استخدمت الفنانين المصريين، وما كانش عندي هدف من ده، بس أنا ساعات بشوف إن في عدم اهتمام بالأماكن من برة، فقلت أخلي المكان أحلى بصور الفنانين. ولو ملاحظة في عمارات كتير ليها جنب كده خالي من الشبابيك والبلكونات. قلت نعمل عليها حاجة بدل ما نسيبها كده، لأن كلنا لازم نحترم البيئة والمكان اللي إحنا عايشين فيه."

عمر الشرف وفاتن حمامة في التحرير

كارمينيه كارتولانو مع ليلى مراد

وعن رحلة استقراره في مصر وإتقانه للغة العربية قال: "أنا نزلت أول مرة في 1999. كنت خريجا جديدا وقتها، وكنت عايز أحسن العربي بتاعي.. لما جيت هنا لاحظت إن اللي درسته في الجامعة كان مختلفا عن الكلام اللي الناس بتستخدمه في حياتهم العادية، ومن هنا بدأت أدرس العامية واستمريت في المذاكرة، وفي نفس الوقت بدأت اشتغل كمدرس لغة ايطالية وفضلت كده شوية، لحد ما قررت أستقر بعد سنين من وصولي هنا."

كوكب الشرق على أحد المباني

مباني وسط البلد باللون الوردي

شجعه على الاستمرار في مصر الكثير من العوامل المشتركة بينها وبين جنوب إيطاليا، حيث وُلِد، وعن ذلك قال: "مصر وإيطاليا بلدين جميلتين ومليانين تاريخ وثقافة وجمال، ده غير إن الشعبين بيحبوا وبيستمتعوا بالحياة. ده الأساس، وبعد كده فيه حاجات متشابهة كثير من ثقافة البلدين زي التأخير في المواعيد وحركات الإيد والصوت العالي وحب الأكل والخروجات والحب للاحتفالات، عندنا برده بنحتفل بكل حاجة، وأنا بتكلم عن جنوب إيطاليا لأن الشمال مختلفين شوية أعتقد."

مباني وسط البلد مزينة بالزهور

مباني وسط البلد

واختتم حديثه عن السبب الذي قد يدفعه لترك مصر والعودة إلى إيطاليا قائلًا: "أهلي هم السبب الوحيد اللي ممكن يخلوني آخد القرار ده، لو عيلتي محتاجيني هناك هسافر على طول، لأن مامتي صعب تيجي وتسيب بيتها هناك."

مبني في وسط البلد مزين بالزهور

نور الشريف وبوسي

وسط البلد مزينة بالزهور