مريم الخشت لـ سمر يسرى: بهتم بقضايا المرأة وتعرضت للتحرش اللفظى والجسدى في الشارع

حلت الفنانة الشابة مريم الخشت، ضيفة في برنامج "يوم ليك" للإعلامية سمر يسرى، المذاع على قناة الحياة، وقالت خلال الحلقة، أن سعاد حسنى هي الأيقونة بالنسبة لها، كما أن الفنانة محسنة توفيق من الفنانات صاحبة الموهبة الكبيرة جدا.

وأضافت مريم الخشت، لما شوفت مسلسل "جراند أوتيل" بقى نفسى أشتغل مع المخرج محمد شاكر خضير، والحمد لله حصل ولكن مشبعتش من الشغل معاه، ونفسى كمان اشتغل مع المخرجة كاملة أبو ذكرى وهانى خليفة والمخرج محمد ياسين.

وتابعت مريم الخشت، أنا بركز مع المرأة ودايما بتناقش في قضايا المرأ خاصة لو أستفزتنى، ونقدر نقول ان بدأنا نشوف ردود أفعال من الناس على ظاهرة التحرش وكويس أنه بقى في لغة حوار في الموضوع ده في الفترة الاخيرة.

وعن تعرضها للتحرش، قالت مريم الخشت: مفيش واحدة متعرضتش للتحرش وعلى الأقل تحرش لفظى وأول تحرش استحالة يتنسى، وانا حصلى تحرش لفظى كتير، وحصلى كمان تحرش وتطاول جسدى في الشارع سواء كنت لوحدى أو معايا واحدة صحبتى.

واستكلمت مريم الخشت، في مرة كنت ماشية مع واحدة صحبتى وكنت جنب بيتى في الدقى، وجه واحد في وشنا وقرر يعدى من وسطينا وطبعا مش هايعدى وهو ساكن ولكن مش هاقول تفاصيل ولكن هو شايف إن الموضوع عادل جدا، وبسبب عدم تصديقنا وقفنا اتصدمنا، وانا مكنتش لابسة حاجة تستفزه ولو حتى لابسة فهو اللى غلطان.