سألنا الأمهات إيه الهدية اللى مش عايزها فى عيد الأم.. طقم الكوبايات متصدر

فى يوم عيد الأم يحتفل كل منا بأمه على طريقته الخاصة، فالبعض يصنع لها أكلة بيديه، والبعض الآخر يأتى لها بشىء ينقصها كهدية، والبعض يكتفي بالورد لتعبير عن الحب، وكثيرًا ما يسأل الأبناء الأم عن الهدية التى تريدها ليضمنوا أن تسعدها وتكون بحاجة إليها، لكن هل جربت أن تسألها عن الهدية التى لا تريدها؟ طرحنا هذا السؤال على الأمهات وإليك "القائمة السوداء" لهدايا عيد الأم. 

"مش عايزة هدية للبيت"

تقول نهلة على صاحبة الـ 48 عاما، والأم لـ 4 أبناء "كل سنة يجيبولي حاجة ناقصة البيت، يشوفوا أى ناقص البيت على مدار السنة ويجيبوه في عيد الأم، السنة دي أنا عاوزة حاجة ليا"، وتابعت نهلة ساخرة "هو عيدي انا مش عيد البيت".

تتفق معها حنان عبد المجيد ذات الـ 46 عاما والأم لبنتين: "بناتي عشان نقلنا جديد السنة اللى فاتت جابوا حاجات للبيت، ومازال البيت ناقصه حاجات"، وتابعت ساخرة "السنة دي هيجيبوا بطانية وأنا مش عاوزة بطانية عاوزة حاجة ليا أنا".

طقم كوبايات

أما منى فاروق صاحبة الـ36 عاما والأم لـ 3 أبناء، تقول "مش عاوزة طقم كوبيات بنتي الصغيرة بتحوش من مصروفها وتجبلي ست كوبيات اعمل بيهم إيه".

ورد

"مش عايزة ورد"

أما آية كرم صاحبة الـ34 عاما والأم لطفلين، فقالت "مش عاوزة ورد مش بحبه أصلا وبيموت مهما حاولت اعتني به. عايزة حاجة مفيدة". 

"مش عايزة هدية وخلاص"

فيما قالت رغد محمد 55 عامًا وأم لخمسة أبناء "ولادي كبار وبيشتغلوا فيجيبوا حاجات غالية، بس معظمها عندى عاوزاهم يشوفوا إيه ناقصنى مش أى هدية وخلاص".

عباية

وتقول نجاح سعيد صاحبة الـ 50 عاما والأم لـ3 أبناء "ولادي كل سنة بيجيبوا لى عباية عشان مش بخرج كتير، في حاجات تانية ممكن تتجاب مش عاوزة عباية السنة دى".