ساويرس: أنا واقف عند سن الـ30 وجوايا طفل..وكنت بروح حى الزبالين عشان أشكر ربنا..فيديو

كشف رجل الأعمال، المهندس نجيب ساويرس، تفاصيل وأسرار جديدة في حياته الشخصية، مؤكدًا  :"بحب اللبس، وبأخذ وقت طويل عشان أقرر ألبس إيه، وليا طريقتى الخاصة، وغاوي تيشرتات مجنونة وبحب ألبس كاجوال.. الذوق مش في الفلوس لكن في التنسيق، ومش باخد رأي حد".

وأضاف خلال حواره على تليفزيون اليوم السابع، :"أنا واقف عند الـ30 ومش بخرج في أي مكان إلا متوسط السن فيه من 25 لـ 40 ومش بتبسط غير معاهم لكن الناس اللي من سني مش بخرج معاهم عشان سلموا نمر.. أنا لسه من جوايا طفل، وممكن أزق صاحبي في حمام السباحة".

وتابع: "لا أهتم كثيرًا بكلام الناس.. اللى بيحبنى بحبه واللى ميحبنيش بقوله أنت حر، وبهتم برضا ربنا رغم ذنوبي، وأنا مبصليش وأول ما بصلى بطلب الرضا والسماح من ربنا، ومش بحب أرقام الهواتف المميزة، ورقمي عادي، وبتفاءل بيه، وواخدة من هيئة المواصلات قبل شراء شركة موبنيل، وعربيتي بقالها 18 سنة ومحتفظ بيها.. والسواق صاحبي وعشرة عمر 20 سنة".

وقال رجل الأعمال، المهندس نجيب ساويرس، إنه لا يهتم كثيرًا بكلام الناس عنه، ولديه حرص كبير، وليس مسرفًا في أموال، قائلًا: "وإحنا صغيرين أمي كانت تاخدنا كل يوم جمعة حي الزبالين في المقطم ونمشى وسط ريحة الشارع وتقولنا عشان تشوفوا الناس عايشة إزاي وأنتوا عايشين إزاي.. عشان تشكروا ربنا وتشوفوا هتعملوا إيه للناس دي لما تكبروا".