لقاء مع صاحبة أجمل قصة وفاء وإخلاص.. نهاد أبو القمصان أرملة الراحل حافظ أبو سعدة

قالت الحقوقية نهاد أبو القمصان أرملة الراحل المحامى الحقوقى حافظ أبو سعدة، فى لقاء مع تليفزيون اليوم السابع، إنها تعرفت على زوجها الراحل فى الجامعة فى سنة تانية، وفى انتخابات اتحاد الطلاب، حصل تحالف بين الناصريين والوفديين فى الجامعة، ليشاركوا بقائمة ضد الإخوان، وذكرت أن أصحابها الوفديين طلبو مشاركتها، قائلا: "رغم أنى لم أكن وفدية لكن مهتمة بالحياة السياسية، وأفكارى تميل للتيار الليبرالى، نزلت معاهم الانتخابات".

 

 

وأضافت نهاد أبو القمصان: "جت الجامعة الصحفية الشهيرة منال لاشين، كانت تغطى انتخابات الجامعة، وتجرى حوارا مع حافظ أبو سعدة لترشحه على منصب رئيس اتحاد الطلبة، وطلبت الصحفية عمل حوار مع أحد الطلاب المرشحين، وحافظ قالها خدى واحدة من المرشحات وأنا استفزيت جدا من طريقته، وقلت أول ما أخلص هتخانق معاه، خلصت الحوار الصحفى، لكن جذبه الكلام وقعد سمعنى، وبدأ يناقشنى فى الأفكار التى طرحتها، بعدها جاء أحد أصحابنا الوفديين يقولى جالك عريس، قلتله عريس ايه ، مين ده ، قالى حافظ أبو سعده قالى قعد يسأل عليكي كتير، أنا طبعا استفزيت لأنى شخصية مستقلة كنت أحب يجي يكلمنى أنا مش يكلم أى حد تانى، لكن هو متكلمش خالص ، قعدت مستنية يكلمنى محصلش، رحت بعدها أنا بكام يوم ، قلتله بقولك ايه انت كلمت إيهاب الخولى عنى، وشه أحمر، قلتله انت كلمت الخولى عنى، مجتش كلمتنى أنا ليه، قالى أصل أنا عندى قضية هاخد إعدام، قلتله ولو، بص انت عاجبنى، بص أنا مش بتاعة صحوبية قدامك سكتين ، إما نتعرف على بعض زى أى اتنين مخطوبين يا ملكش دعوة بيا ، موضوع الإعدام نناقشه بعدين ، لو أخدت إعدام يبقى أمر الله نفذ ، بصلى كده ووشه مابقاش عارف يرد ، ديه مجنونة ولا ايه؟".

 

وأكدت أن والدها لم يكن رافضا لحافظ لشخصه ولكنه كان خائفا على مثل كل أب، لأن بالنسبة له حافظ شخص عليه قضايا سياسية قد تدفعه للإعدام، وحافظ من أول يوم قالى أنا عايز اتعرف على إخواتك واتعرف عليهم، وفعلا هو وهانى أخويا بقوا أصحاب من قبل ما حافظ يدخل بيتنا، وهانى كان طرف معايا إنه يقنع بابا.