محمد رياض عن مشاركته فى مسلسل النمر: تريند والكواليس مليئة بالكوميديا والجد

استضاف تليفزيون اليوم السابع النجم الكبير محمد رياض الذى يشارك فى موسم رمضان الدرامى بمسلسل "النمر" ويلعب دور "الشيمى رضوان".

وعن شخصيته في المسلسل قال محمد رياض:" الشيمى رضوان هي شخصية كانت من الشخصيات المهمة اللى انا عملتها في تاريخى .. أول مرة أجسد تاجر ذهب وألماس ووجوده في الصاغة والناس كلها عارفه مكانها في الحسين والقاهرة الفاطمية الجميلة  .. فبنشوف كل الأجواء بتاعتها والعلاقات الإنسانية الموجوده . فالشخصية أنا كنت حاببها جدا ومستمتع بيها جدا وأسرة المسلسل الأستاذة شيرين عادل هي اللى رشحتنى لهذا الدور والعمل وأنا سعيد انى بشتغل معاها لأول مرة .. ولأول مرة بشتغل مع محمد عادل إمام .. وهو ممثل موهوب مجتهد وخلوق ومحترم وبجد مبسوط جدا اننا اشتغلنا سوا والتقينا في هذا العمل .. وبيومى فؤاد ونيرمين الفقى وحجاج عبد العظيم .. وكل الشكر للناس اللى ورا الكاميرا .. والإنتاج طبعا شركة سينرجى اللى وفرت كل الإمكانيات للعمل ده انه يطلع بالصورة دى "

وعن العمل لأول مرة مع المخرجة شيرين عادل والنجم محمد عادل إمام قال محمد رياض :" قال خدنا على بعض بسرعة والروح كانت جميلة جدا .. مفيش توتر الحياة كانت لطيفة جدا .. وكان في جدية .. الأستاذة شيرين مبتفوتش أي حاجه .. كل الناس كانت عايزه تعمل شغل حلو .. بقينا أصدقاء جدا وبقيت بحبهم أوى .. الكواليس كانت رائعة وكنا في بنصور في رمضان وبنفطر مع بعض ... وفى كوميديانات كتير في العمل منهم محمد عادل إمام وبيومى فؤاد وحجاج عبد العظيم .. كمان أستاذة شيرين عادل دمها خفيف جدا .. وانا استمتعت بالكواليس جدا جدا .. لسا باقينا شوية تصوير وان شاء الله الأمور تنتهى على خير يا رب "

وعن تفاصيل دوره كتاجر ذهب قال محمد رياض :" المؤلف الأستاذ محمد صلاح العزب .. قعد كتير مع الناس بتوع الذهب في الصاغة .. راح شاف كل تفاصيل الصاغة وكتبها في الورق وكان معانا حد متخصص من الصاغة نفسها .. في طريقتهم في الكلام لو حد غريب وكل التفاصيل الصغيرة .. وصورنا في مصنع ذهب حقيقى وقدرنا نصور جوا المصنع ونشوف تفاصيل تصنيع الذهب "

وعن ردود الأفعال من الجمهور ومن زملائه في المهنة قال: "ردود الفعل كلها إيجابية والحقيقة كانت إيجابية أكثر مما توقعت .. المسلسل من المسلسلات الناجحة جدا السنة دى .. نسبة مشاهدة كبيرة جدا .. كان تريند بشكل كبير .. وجالى زمايلى كتير الأستاذ صلاح عبد الله أخويا كلمنى ... وزوجتى كمان رانيا محمود يس رغم انها صعبة جدا فلما في حاجه بتعجبها بتبقى حقيقى كويسة .. وهى عاملة مسلسل مهم جدا السنة دى وعاملة دور ليلى نصار في المسلسل .. ونقاد وصحفيين وحضراتكم .. أنا مبسوط جدا وبحمد ربنا جدا .. وزى ما قولتلكم احنا أسرة فنية فنقدنا وتقييمنا بيبقى أكثر بكتير من الجمهور العادى "