حياة كريمة فى جولة جديدة بالمحلة.. جيران "أم يوسف": حالتها المادية صعبة بسبب غياب زوجها وهى اللى بتربى العيال.. والبرنامج يملأ محلها بأدوات منزلية ومنظفات ويسدد ديونها.. وترد باكية: "مش قادرة أوصف فرحتى"

أجرى برنامج "حياة كريمة"، المذاع على قناة DMC، جولة فى مدينة المحلة بمحافظة الغربية للقاء السيدة "أم يوسف"، من أجل تقديم المساعدة لها، حيث استمع البرنامج إلى جيرانها الذين أكدوا أنها حالتها المادية صعبة بسبب غياب زوجها عنها.

ام يوسف بمحلها

وأضاف جيران أم يوسف، خلال البرنامج: "الست أم يوسف ظروفها مخبطة وزوجها مش موجود، وعندها عيال بتجرى عليهم.. وكل ما تفتح حاجة الديون تتراكم عليها عشان هى مسئولة عن أسرة كلها.. وهى زوجة لإنسان كتب الله عليه إنه ميهتمش بأسرته.. وزوجها بيمشى ويسيبها ومن زمان على الحال ده من يوم ما أتزوجت".

وتابع جيران أم يوسف: "زوجها من بعد ما تزوجها وليه 10 سنين مش بيشتغل.. وهى تشتكى من مرض الروماتيزم.. ومش بتقدر تشتغل فترة طويلة وبتجيب بضاعة والدنيا بتمشى معاها.. ومفيش حد بيساعدها.. وعندها بنت كبيرة وابنها الصغير فى مراحل الابتدائى.. وطفلة صغيرة.. ومحلها مفهوشى بضاعة واتكسر عليها الإيجار.. هى عاوزة حاجة تشتغل وتاكل منها عيش".

محل ام يوسف

وأهدى برنامج حياة كريمة، المذاع على قناة DMC، السيدة "أم يوسف" محلا بعقد إيجار، كما ملأ المحل بالأدوات المنزلية والمنظفات وسدد الديون المتراكمة عليها كى تتمكن من البيع لكسب الرزق وتربية أبنائها.

وقالت أم يوسف وهى فى حالة بكاء: "عيشتى مدربكة وكنت فاتحة دكان على قدى ببيع فيه المنظفات.. وحاليا مش شغالة وكانت الدنيا ماشية وبعد ما ولدتى أتوفت الخير كله راح.. وعندى 3 أطفال سما فى أولى إعدادى، ويوسف فى رابعة ابتدائى، وبنتى الصغيرة عنها 5 سنين".

محل ام يوسف وابنتها

وأضافت أم يوسف: "بتمنى أن أى حد يقف معايا بس.. ووقفت مع ناس كتير ومحدش وقف معايا ولما وقفت معاهم محدش جه وقف معايا.. ووالدتى متوفيه لسة معداش عليها الأربعين.. اتراكمت عليا الديون لحد ما وصول إلى 9600 جنيه".

وقالت مذيعة الحلقة لأم يوسف: "بركة الست الوالدة قعدالك وادى الـ9 آلاف جنيه والمحال مليان بالمنظفات والأدوات المنزلية لإعالة أسرتك"، وترد أم يوسف: أنا فرحانة ومش قادرة أوصف فرحتى باللى حصل ده ومكنتش مصدقة والحمد لله".

أم يوسف