محمد سامى: مى عمر محترفة وشاطرة جدا.. وأكتر واحدة حفظانى

تحدث المخرج محمد سامي، عن علاقته بزوجته الفنانة مي عمر، قائلا: "وهو أنا بعمل حاجة غير اني بكدب عليها كزوج مش كمخرج، وعلى طول بتقفشني لأنها أكتر واحدة حفظاني في العالم، وبغير الكذبة 3 مرات، وبعد كده بقول الصراحة.. من خاف سلم".

وأضاف سامي، في حواره مع الإعلامية بسمة وهبة مقدمة برنامج "العرافة"، الذي يعرض عبر قناة "المحور": "وبالنسبة للتعامل معها في اللوكيشن، فقد أتعامل معها بشكل مختلف من كل فترة لأخرى، فقد كانت تظهر 10% من قدراتها أمام الكاميرا وكنت أنفعل جدا، لأنها كانت تؤدي في البروفات بشكل أفضل، وهذا كان يرجع إلى انعدام خبرتها".

وتابع: "حبي لها كان مخليني غيران عليها، وعاوزها تبقى أحسن حد، لأنها مراتي حبيبتي، وبالتالي كنت ببقى قاسي عليها جدا.. كنت بوترها جدا وبتعامل بطريقة غلط جدا وأزعق لها وأقول لها يا بنتي، وزمايلني كانوا يقولوا لي بالراحة عليها هي لسه بتدأ، وبعد شوية الانفعال بقى يجي من منطقة تانية، ولما بقت شاطرة وبقى عندها خبرة الموضوع اختلف، ولما بقت نجمة بقيت أفرمل نفسي".

وواصل: "مرة كنا في باريس قالت لي جملة ضايقتني أوي، مش بتاخد بالك إنك في التصوير بتبقى أكتر في الإنفعال عليّ لأني أقرب حد ليك، والموضوع ده بيضايقني وبتحرج لأننا في وسط الناس"، لترد عليه الإعلامية بسمة وهبة قائلة: "أصل مش هتسيب لك الأوردر وتمشي".

ورد عليها محمد سامي، قائلا: "لأ طبعا متقدرش تمشي وتسيب اللوكيشن وده عشانها ومش عشاني، وعموما أنا رديت عليها وقلت لها أنا خايف عليكِ وعاوزك تبقي كويسة، لكن هي قالت لي أنت خايف على الباقيين ومش بتتعامل معاهم زيي، ومن اليوم ده بقيت أتعامل معها بطريقة مختلفة، وخاصة دلوقتي بقيت أتعامل معاها باحتراف وزيها زي كل الممثلين.. هي إنسان محترف أوي وشاطر".

وحول تعرضها للهجوم، قال: "ده بسبب وجودي، الناس من الأول قالوا إن مي نجحت عشان جوزها، ومفيش حاجة اسمها كده، ومسلسل لؤلؤ كان بطولة مطلقة ليها ونجح في الوطن العربي كله، والناس اللي بتكتب على السوشيال ميديا حاجات كتير بتبقى حاجات لناس وناس حقيقية بس عاوزة تكون مكاننا".

قال المخرج محمد سامي، :" يرى هناك أكثر من نوع للكذب، مثل الكذب الذي يستخدم للهروب من المواقف معتبرا إياه كذبا مباحا عند اللزوم، وكانت أخر مرة كذب فيها قبل الظهور في هذه الحلقة مباشرة عندما أخبر ابنته تايا أنه سيحضر شيئًا من السيارة بالرغم من أنه كان متواجدا في الاستديو".

وأضاف سامي: "وبالنسبة لأكثر ممثل صادق، فأنا سأختار 3 مع الوضع في الاعتبار أنني تعاونت مع ممثلين صادقين كثر، لكن أولهم الراحل محمود الجندي، فقد أخرجت أول مسلسل لي من بطولة تامر حسني وهو مسلسل آدم، وكان الجندي متعجلا ولم يكن مزاجه صافيا وعندما سألته عن بعض التفاصيل لم يكن مهتما بكلامي وقرأ لي المشهد سريعا، فطلبت منه بأن يمثل المشهد من قلبه، فمثل المشهد وصفقت له لمدة 5 دقائق".

وتابع: "أما الممثل الثاني فهو أحمد زاهر، والممثل الثالث الصادق الفنانة سلوى عثمان وهناك الفنانة فردوس عبدالحميد".