محمد سامى يعتذر لمغنى أردنى: عملت له كليب وحش وأنا صغير.. ومستعد أعمله حاجة جديدة على حسابى

كشف المخرج محمد سامي سر نجاحه، قائلا: "أنا عصبي وأحرص على أن تخرج الأعمال الفنية بأفضل شكل.. بحب الشغل يطلع صح أوي ومعظم خلافاتي اللي حصلت في حياتي كان لها علاقة بالشغل وملهاش علاقة بحياتي الشخصية، وفي سن معين طريقة التعبير عن الخلاف مش مدروسة، والواحد اتعلم".

وحول أبرز واقعة تعرض فيها للخيانة في الوسط الفني قال سامي، في حواره مع الإعلامية بسمة وهبة مقدمة برنامج "العرافة"، الذي يعرض عبر شاشة "المحور": "أكتر حاجة كانت مع مدير إنتاج، كنت بصور فيديو كليب لمطرب مهم جدا في دولة عربية، ورحت أنا والمطرب الصبح ملقتش تصوير، أخد الفلوس ومشي، وكل حاجة كانت راحت.. أخد 500 ألف دولار ومشي".

وعما إذا قام بخيانة أي جهة من الوسط الفني، قال سامي: "الموضوع ده بيتعبني نفسيا طول الوقت، عملت deal مع شركة أردنية كانت تنتج لـ3 مطربين مكنوش مطربين، وكنت هخرج لهم فيديو كليبات، وكان في أغنيتين عاجبيني وأغنية مش عاجباني فعملت أغنيتين حلوين أوي، والتالت عملت له فيديو كليب وحش أوي مكنتش مقتنع باللي بيغنيه ولا مقتنع بيه.. الفيديو كليب كان وحش بتقصير، والمغني اسمه "عامر" وحسيت إني ظلمته ومكنتش أقصد، ومستعد أصلح الغلطة وأعمل له فيديو كليب على حسابي".

وقال المخرج، إن ضياع حقوقه في الخلافات بسبب انفعاله هو أكبر مشكلة تواجهه، موضحًا: "ده كلام المقربين مني، هم دقيقتين في حياتي بيبقوا فاصل في حاجات كتير، وأنا سريع الغضب بشكل مبالغ فيه، بس براجع نفسي دايما بس ببقى متأخر زيادة عن اللزوم".

وأضاف سامي: "أما بالنسبة لأكتر شخص ظلمني، فهو الفنانة غادة عبدالرازق، ومع الوقت حسيت إن ربنا سبحانه وتعالى كان كويس معايا".

وتابع: "جات لي قدام العربية ووقفت وسلمت عليّ، وقالت لي أوعى تكون زعلان مني.. عملت معاها شغل كويس وفي عيش وملح.. وعملت معايا تصرفات ما بعد المشكلة.. واتقال كلام كتير عليّ مش حقيقي، وبعدها ربنا جاب لي حقي في حاجات كتير وخلاني أحس بالسعادة".

وأردف: "غادة عبدالرازق مكنتش وحشة طول الوقت، لكن الناتج النهائي اني خرجت بموقف منها، وبعدها ربنا بيكرم حسب اجتهاد كل واحد فينا وأنا ربنا كرمني كتير".