لقاء الخميسى: شخصيتى بـ"ضد الكسر" مش شريرة.. وأغرب تعليق جالى إنى باكل صباعين روج

حلت النجمة لقاء الخميسى ضيفة في "تليفزيون اليوم السابع"، وكشفت خلال اللقاء عن كواليس دورها في مسلسل "حرب أهلية"، والذى عرض في شهر رمضان المنقضى، وقالت: "شخصية "نادين" شخصية جديدة عليا تمامًا وأول مرة أعمل هذه التركيبة، واستمتعت جدًا بالشخصية لأنها مختلفة وبداخلها مشاعر مختلفة، وانا أراها إنسانة عادية جدًا رغم أن الكثير من الناس وصفها بأنها شخصية شريرة، لأنى رأيتها بها بعض الأشياء الجيدة وبداخلها أشياء مخفية زى عادة الإنسان بيكون كلنا فينا حاجات وحشة وحاجات حلوة وأحيانًا بنتعصب وبنعمل أخطاء، وده طبيعى لها لأنها بتحب شخص وغيرانة عليه وصاحبتها أخدته منها، فأكيد ده سبب مقنع للى كانت بتعمله.

وأضافت: "صعوبة الدور لم تكن فى مشهد بعينه ولكن كان أصعب شيء هو أن الشخصية لديها مشاعر طوال الوقت لا تعلنها بالكلام ولكنها تستخدم نظرات العين وتعبيراتها، وعندى تعليق على أول مشهد في الحلقة الأولى، لما بتقول بلدى وهيفضل بلدى، ده بيحصل في الواقع أن الستات بياخدوا بعض بالحضن، وأول ما تلف تقول عليها شوفتى لابسة إيه لبس مضروب، وأكيد حصلتلى الحاجة دى في الحقيقة ولكن مش بزعل لأنى بعطى لها مبرر بأنها مش واثقة في نفسها".

وعن كواليس العمل خاصة أنها تشارك نيللى كريم للمرة الأولى في مسلسل، قالت لقاء الخميسى: "الكواليس كانت هادية جدًا، والست نيللى كريم رايقة على الآخر وفى حالها، وبتسأل عن المشهد إيه هو وبتصور وتخلص وتروح، لا بتتدخل في حاجة ولا بتقول ملحوظات في أي شيء، يعنى تعتبر بتقول انا جاية أمثل في مخرج ومؤلف هما المسئولين عن التعديلات ودى أحلى حاجة فيها، وانا ومعظ فريق العمل كنا زيها بالظبط".

وعن أغرب التعليقات قالت لقاء الخميسى: "موضوع الروج الأحمر عمل أزمة رهيبة واتعمل عليه كوميكس على مواقع التواصل الاجتماعى ويقولوا مدام لقاء كل يوم بتاكل صباعين روج، وكنت بقعد اضحك جدًا وفى ناس كانت بتسألنى على الروج وببعتلهم رقم الروج في تعليق، وبالنسبة لملابسى في المسلسل أنا أصلاً غاوية فاشون فقدرت أنسق ده مع الأستايلست".

يذكر أن آخر أعمال لقاء الخميسى مسلسل "ضد الكسر" ويشاركها فى البطولة نيللي كريم، ومحمد فراج، ومصطفى درويش، وهشام إسماعيل، وحمزة العيلي، تأليف عمرو الدالي، وإخراج أحمد خالد، وإنتاج مشترك بين سينرجي والعدل جروب.