إنجى المقدم: دورى بـ"الاختيار 2" مختلف.. والشغل مع كريم عبدالعزيز ممتع

كشفت الفنانة إنجى المقدم عن معايير دورها فى مسلسل الاختيار 2 قائلة: "دور مختلف وتحدى ليا وحاجة جديدة بعملها..وأشوف أخرى فى حاجة معينة وأعرف أخرى إزاى، والمشروع كله كتابة محترمة وفريق محترم ومخرج محترم، واللى بيشتغلوا وعارفة شغلهم عامل إزاى".

وعن العمل مع الفنان كريم عبد العزيز، قالت خلال حوارها مع الإعلامى يوسف الحسينى عبر برنامجه التاسعة المذاع على قناة الأولى المصرية: "الشغل مع كريم عبدالعزيز متعة كارزمة شطارة وخبرة وتعاون والتزام ونموذج بيشتغل سنين.. وعلى الهادى وسلس وعينه بتتكلم ومش بيعصر حاجة ولذيذ ورايق.. وعنده ميزة رهيبة وأنت بتمثل قدامه طبيعى وبسيط.. وهو سهل ممتع بجد.. ولما بشوفه على الشاشة مش أى حد يعمل كده".

وأضافت: "أول مشهد تم تصويره مشهد لما قولت خبر وفاة الشهيد محمد مبروك مع الفنانة بشرا فى المسلسل الاختيار 2.. وعيطت وأنا بتفرج على المشهد لما شوفته.. وبيتر ميمى بدأ بالمشهد الصعب فى المسلسل كله.. بعد ما قال كات المخرج أنهرت بالدموع.. وبكت على الهواء بعد مشاهدة المشهد مرة أخرى، ومشهد صعب جدا".

وعن دورها نظلى فى مسلسل هجمة مرتدة، قالت: "دكتورة فى علم النفس يستعينوا بيها فى المخابرات لتسيطر على الفريق.. وشخصية ماكرة جدا ومتحفظة ومسيطرة ويتعمل لها ألف حساب ويتخاف منها وآرائها دائما فى المواقف الأخيرة وبتجيب من الأخر.. وتخيلت واحدة زى دى لغة جسدها عامل إزاى وأديها متتحركش كتير وثابتة.. وكان كله اجتهاد، وواحدة بالشخصية دى هتعامل إزاى وعندها ثبات انفعالى رهيب.. والشخصية ليست حقيقة".

أما عن دورها فى التقديم الإذاعى، قالت: "كنت بحب أعمل تقارير إذاعية ومكن شده حلمى وكنت عاوزة أمثل طول الوقت.. وعندى ألفى مع الكاميرا ومش بخاف منها وهى دى الميزة للإذاعى".

وتابعت: "نفسى أمثل شخصية شجرة الدر.. والشخصية مخدتش حقها خالص فى التمثيل ونفسى جدا أمثلها.. وإحنا ماشين فى سكة تسليط الضوء على الشخصيات اللى زى دى.. وبحب أشوف الشخصيات دى لأن فيه ناس مش بتعرف مين هى شجرة الدر ولية منطلعش الناس اللى محدش يعرف عنهم حاجة.. وعندنا إمكانيات أننا نعمل فيلم تاريخى بس لازم ياخد وقت فى الكتابة والمراجع وتفاصيل الشخصيات والأحداث ونقدر نعملها بسبب وجود المقاومات اللى متوافرة، ونفسى أقدر أوصل لمرحلة أنى أقول نعمل ده، ولكن أنا فى مرحلة اختيار الأدوار اللى همثلها".