"أحمد" استغل بواقى مطبخ الخير لعمل سبيل لكلاب وقطط الشارع.. خيره للكل

تبحث الحيوانات الضالة بالشوارع عن لقمة ملقاة على أحد الطرقات أو أمام المطاعم، أو بعض الماء لتتناوله وتطعم صغارها خاصة فى نهار فصل الصيف والطقس الحار، مما دفع أحمد سالم، للتفكير فى إنشاء سبيل لحيوانات الشارع من قطط وكلاب .

تجهيز السبيل

تحدث أحمد سالم، خريج كلية الأداب، قسم علم نفس، عن سبيل حيوانات الشوارع، لـ "اليوم السابع" قائلاً :" أسست فريق خيرى بعد حصولى على الثانوية العامة، وهدف الفريق تجهيز وجبات طعام لغير القادرين والأيتام والمرضى، أسبوعياً ويومياً فى رمضان، وكنت بلاحظ أن القطط والكلاب بتتجمع وإحنا بنحضر الأكل، و ده خلانى أفكر فى سبيل  للكلاب والقطط".

أثناء تجهيز السبيل

وأضاف :" عملت السبيل فى مكان متكون من مصطبتين وحطيت فيه 3 علب بلاستيك وثبتهم بجبس وأسمنت، بحيث يكون فيه علبة لأكل الكلاب وعلبة تانية لأكل القطط وفي النص مايه، و ده فى منطقة الصف بمحافظة الجيزة، بلدى، ومكان المطبخ اللى بجهز فيه الوجبات، بحيث نحط فيه بواقي أكل المطبخ ونتابعه باستمرار، يعني إحنا مثلاً، بنعمل 200 وجبة فراخ بنطلع منها الرجول والهياكل بتاعتهم ونحطها في العلب دي بدل ما تترمي ".

صورة أخرى لتجهيز السبيل

ولم يكتفى أحمد بإنشاء هذا السبيل فقط بل ينوى فى إنشاء سبل كثيرة بالمنطقة، حيث قال :"ناوي أنشر الفكرة في الصف عندنا في أكتر من مكان، وأشجع غيري، إنه ينفذها جنب بيته، وكمان بتكلم مع الأطفال على إن غلط نطوح الكلاب والقطط بالطوب من غير أي سبب وحرام ناخد الكلاب الصغيرة منهم ونربيها إحنا لأننا كده بنحرمهم من أمهم، وكمان بنصحهم يخلوا بالهم من العلب ويحطوا فيها أكل ومايه ومايخلوش حد يكسرها ".

السبيل

وتابع :"ناوي إن شاء الله أعمل حاجه للطيور الحمام والعصافير وكده وهبدأ بالمقابر تكون سبيل ليهم ولكل موتي المسلمين، وبعدين أعملها في أسطح البيوت والدور الأخير من كل عماره".

وعن رد فعل المارة على سبيل الكلاب والقطط، قال أحمد :"ناس فى الأول قالت لى أنت فاضي ياعم هو انت فاكر نفسك فين، وناس قالت البني ادمين أولى ودول بشرح لهم الفكرة، إنها بسيطة جداً وتعتبر ببلاش والأكل بيكون بواقي الأكل بتاعنا وبتاع الإطعام اللى بنعمله وكمان المايه ببلاش".

سبيل

وتابع :"العلبة اللى بحطها سعرها 10 جنيهات، يعني الـ 3 علب بسعر 30 جنيها و أسمنت وجبس بـ 10 جنيهات، يعني ثواب دايم وصدقه جارية عظيمة زي كده بـ 40 جنيها بس".

صورة أخرى للطعام

كلب يتناول الطعام من السبيل