الفنان محمد محمود عن دوره بـ"زركش": مشهد واحد بنعمله فى يوم واحنا سعداء

علق الفنان محمد محمود، عن دور طريف فى مسلسل نجيب زاهى زركش، قائلا: "كل حاجة كانت منضبطة.. ومفيش حد بيضيف من عنده خالص.. وكل همنا نشتغل على الورق ونعمل بروفات قبل التصوير.. ومشهد واحد بنعمله فيه يوم كامل واحنا سعداء.. وبنعمل حاجة صح على كل المستويات.. الشخصية مركبة ومش عادية وليها أبعاد".

وأضاف خلال حواره مع الإعلامى يوسف الحسينى، عبر برنامجه التاسعة المذاع على القناة الأولى المصرية: "طريف كان عنده حقد طبقى ونفسه يكون ملكه القصر.. والشخصية كان فيها كل المواصفات طيبة وشريرة.. وخدام فى القصر عاوز يبقى ملكه وكمان يبقى زوجته أخت نجيب.. والشخصية ماتعرف شرير ولا طيب وصعوبتها لها أبعاد مختلفة ومش سهل إنها تتعمل، وقعدنا شهر نعمل بروفات منفصلة مع المخرج قبل التصوير".

وتابع: " ليا 35 سنة بعمل مسرح واخد كل حياتى.. وخدمنى فى شخصية طريف وبيدى ثقة ومصداقية للفنان ومهم جدا للفنان.. اشتغلت مع الدكتور يحيى فى مسرحية من فترة كبيرة جدا.. وأول مرة أبقى فى مسلسل كبير مع الدكتور.. نفسى أعمل تجارب مسرحية لأن المسرح ده فى دمى.. وبحبه جدا بحس بنفس الجمهور وبضحكهم وعياطهم.. ولا حاجة تغنينى عن المسرح".