"سارة" عشقت جمال الطبيعة فجسدته فى إكسسوارات مستوحاة من البحر والزهور

تعشق سارة الطبيعة بكل تفاصيلها، فهى تجد راحتها عند النظر للسماء وقت الليل وهى مزينة بالنجوم والقمر، وتستمتع بتغريد العصافير عند سطوع الشمس، وتشعر بالاسترخاء عند النظر للبحر وسماع أصوات أمواجه، وحبها الشديد للطبيعة، أثر فى تصميمها للإكسسوارات، التى صممتها على هيئة أمواج بحر وزهور.

أقراط

تصميم سارة

تحدثت سارة عبد الله، خريجة كلية التجارة شعبة اللغة الإنجليزية، عن تصميماتها قائلة: "كنت بشتغل مصممة جرافيك من البيت لفترة، لأنى أم لخمس أطفال، ولأنى بحب الرسم والألوان وكل حاجة مصنوعة بالأيد، وبحب الجمال المريح للنفس والعين اللي بنلاقيه في الطبيعة وفي خلق ربنا حوالينا، زى البحر والزهور بألوانها المختلفة والخضرة، لقيت نفسي في إكسسوارات الريزن وساعدني ده إنى أستعيد شغفي بالجمال وأعمل حاجة بحبها وأحولها لمشروع ناجح ".

تصميمات سارة

حلق أخر

تعلمت سارة تصميمات الإكسسوارات من شقيقتها وإضافتها لتصميماتها لمساتها الفنية الخاصة بها، وقالت: "اتعلمت من أختى سمر تصميم الإكسسوارات في البداية وبعدين أنا كملت وبالتجارب اللى كنت بنجح فيها وأفشل أحيانًا، وكمان فيديوهات تصميم الإكسسوارات على الإنترنت، ساعدتنى أكتر، وقدرت أصمم إكسسوارات كتير، زى السلاسل والحلقان والخواتم وإسورة، وكمان برسم لوحات فنية مستوحاة من الطبيعة".

حلق

خاتم

تواجه سارة بعض الصعوبات فى عمل تصميم الإكسسوارات، والذى عبرت عنه قائلة: "بتواجهني صعوبات وهى الحصول على الخامات المستوردة، بسبب الروتين بتوصلى بعد فترة".

سلاسل

وختمت سارة حديثها، معبرة عن أحلامها التى تحلم بتحقيقها فى المستقبل، حيث قالت: "نفسي في المستقبل يكون ليا جاليري، أعرض فيه شغلي وبقى له فروع في أنحاء القاهرة والمحافظات، وربنا يوفقنى وأقدر أوصل منتجاتى لدول تانية ".

لوحة

ميدالية

سلسلة