شريهان أبو الحسن بـ"راجل و2 ستات": دراسة تؤكد تأثير عصبية الرجل بالسلب على الصحة الجسدية للمرأة.. هيدى كرم: الست تقدر تعصب الرجل جدا وبتهدأ بسرعة بعد ما تسمعها.. وأحمد صلاح حسنى: العصبية ضغط وناس بتمرض منها

يناقش برنامج "راجل و2 ستات" المذاع عبر قناة ON تقديم الإعلامية شريهان أبو الحسن، والفنان أحمد صلاح حسنى والفنانة هيدى كرم، كيفية التعامل مع الشخص العصبى.

قالت الإعلامية شريهان أبو الحسن، إن دراسة أمريكية بجامعة شيكاغو تؤكد أن عصبية الراجل تؤثر بالسلب على الصحة الجسدية للمرأة، والدراسة أجريت على 1250 زوجا وزوجة، على مدار 12 عاما.

وأضافت، خلال برنامجها راجل و2 ستات المذاع على قناة on: "العلاقة اللى بيبقى فيها طرفين بيفضفضوا من وقت للتانى وبيخرجوا اللى جواهم، وقد يحتدوا على بعض فى بعض الأحيان، وتكون إلى حد ما علاقة صحية، وفى كل مرة الست بتمتص العصبية للراجل، وكده الراجل هيزيد فى العصبية أكتر من الأول، ولكن من وقت للتانى تعلى الزوجة العصبية قدام الراجل، والعصبية بتعيب الراجل قوى عن الست".

وعلق الفنان أحمد صلاح حسنى قائلا: "الست بتيجى عند جزء وتوقف العصبية الراجل معندوش فرامل فى الموضوع ده.. الست فى الآخر بتتعصب لوقت معين ولكن ممكن بكلمتين تعصب الراجل، الراجل معندهوش فرامل فى العصبية، والست تروح نازلة، والعصبية ضغط وفى ناس بتمرض من وراء العيب ده".

وتابع، خلال البرنامج: "العصبية دى إرادة شخصية، والست عرفت أن الراجل ده عصبى وعرفت بالطريقة فى لحظة ما تمتص غضبه، ومن الحاجة الحلوة أن اللى قدامك وقت العصبية خايف عليك وعلى خاطرك وزعلك، ولأن فيه ناس عصبية واللى قدامها مش بيساعدها خالص".

وعلقت الفنانة هيدى كرم: "ممكن الست تقول لزوجها أنك تعصبت فى وقت مش محتاج لعصبية، وفى الوقت ده بدأ يأخد باله أنه موضوع العصبية متكرر، ومن رأيى أن العصبية عند الرجالة أكثر من الست، ولكن لما تشوف ست عصبية مش بيعيب الست أكتر من الراجل".

وقالت الفنانة هيدى كرم، إن السيدة تستطيع أن تصيب الرجل بالعصبية الشديدة، ولكن فى بعض الأحيان هناك من الرجال "مستفزين" للغاية، متابعة بالقول: "صفة العصبية موجودة عند الراجل والست ومش مقتصرة على حد واحد، ولكن بتختلف حسب الظروف عند الاتنين".

وأضافت هيدى كرم، فى برنامج "راجل و2 ستات" مع الإعلامية شريهان أبو الحسن، والفنان أحمد صلاح حسنى، عبر قناة ON، أن علم النفس يؤكد أن السيدة يمكن أن تهدأ بسرعة شديدة عند سماع مشكلاتها، مردفة: "اللى بيحصل إنها لما بتتعصب الراجل كرامته بتنقح عليه جدا، ومش بيديها فرصة.. طيب اسمعها".

ورد عليها الفنان أحمد صلاح حسنى، قائلا: "أسمعها يعنى هتقعد 3 أيام ترغى وهتعصبنى من كتر الرغى بقى"، لتقول الفنانة هيدى كرم: "وإيه المشكلة لما تسمعها دى مراتك".

وأكملت هيدى كرم: "مرة كنت قاعدة مع ابنى علشان أديله خبرتى فى الحياة، فبعد ما قعد سمعنى ساعة، جه فى الآخر قالى ماما ماتعبتيش.. أنا بقالى ساعة بسمعك وانت بقالك ساعة بتتكلمى فى نفس النقطة من محاور مختلفة"، فقاطعها أحمد صلاح حسنى قائلا: "الكلام الكتير بيسيح كل حاجة فى بعض، فهتوه منك من المعلومة اللى عايزة توصليهالى".