حكاية "عم عاطف".. قضى 68 سنة بين العمل ورعاية القطط والكلاب

"عم عاطف"، 68 سنة، قضى عمره بين العمل ورعاية الحيوانات الضالة فى كافة شوارع المنطقة بالدرب الأحمر، تعرفه الحيوانات وتأتى إليه يوميا فى الساعة الواحدة ظهرا وهى ميعاد وجبة الغداء، والساعة السادسة مساء وهى لوجبة العشاء. 1000 قطة وكلب من كافة المناطق تدافع عنه بحياتها، وفى حلقة جديدة من برنامج "فتحى شو"، تقديم محمد فتحى عبد الغفار، نسلط الضوء على قصة مؤثرة تحدث فى شوارع المحروسة بطلها رجل طيب يدعى "عاطف الوى".

ويقول عم عاطف: "أنا اب لـ 3 بنات واحدة فى إعلام والتانية فى ألسن والأخيرة تزوجت وجوزها توفى، وكمان أب لطفل يتيم خدته من أمه لأنها أطلقت فى سن صغير وقولنا نجوزها ونأخد الولد نربيه، حكايتى بدأت لما بناتى التلاتة بدأوا يشوفوا خيالات وتعبوا نفسيا وروحت أعالجهم وصرفت وقتها اللى ورايا واللى قدامى واستلفت من ناس فلوس ومكنش فى نتيجة فى علاجهم لحد أما عزلت من الشقة جيت هنا الدرب الأحمر الكلام ده من 15 سنة".

واستكمل: "جيت هنا وفى واحدة ست قعدتنى فى أوضة أنا وعيالى وزوجتى، وجه واحد حط قطتين قدام باب بيتى بناتى خدوهم وبقوا يحطلهم أكل يوميا، واتعالجوا بفضل الله بسبب القطط، من ساعتها وأنا واهب حياتى ليهم، فى يوم كنت قاعد قدام الدكانة مهموم وهما كانوا حواليا وانا كل يوم لما باجى أو حاجة بعملها إنى بكنس الدكان والشارع كنت محتاج 2000 جنيه علشان اجدد رخص العربية أيام ما كان معايا عربية وفجأة لاقيت قطة كنت مسميها الحاجة خرجت من الدكان وفى بقها كيس أسود فتحته لاقيت فيه الـ 2000 جنيه".