سابت روسيا عشان شمس مصر وناسها الطيبين.. فيرا أشهر مصممة أزياء روسية تزوجت مصريًا من 20 سنة.. وتؤكد: المصرى أحسن راجل فى العالم وبيحب عيلته وولاده.. بعرف أطبخ ملوخية وبط وبعمل أزياء محتشمة للمحجبات

عشقها لمصر والمصريين كان رقم واحد في حياتها فتركت بلدها روسيا واستقرت فى مصر منذ 20 عاما وتزوجت مصريا وأنجبت منه ثلاثة أبناء وأصبحت من أشهر مصممى الأزياء فى مصر وهى "فيرا زولوتاريفا".

"الشمس والبحر والهوا فى مصر مختلف عن أى دولة تانية حتى الراجل المصري هو أقوى رجل فى العالم وأكثرهم طيبة وانتماء لعائلته"، هو رأى فيرا عن مصر والرجل المصرى، وعن بداية حكايتها قالت لـ اليوم السابع": كنت بزور مصر للسياحة فقط وحبيتها جدًا من أول مرة حبيت هواها وشمسها والمصريين، وكنت كل مرة بروح روسيا عاوزة أرجع لمصر تانى وتالت ومش عاوزة أسيبها وعاوزة أعرف أكتر عنها، وفى آخر زيارة لى قررت استقر فى مصر ومرجعش تانى".

وعن قصة زواجى من مصري: "كان ذلك عن طريق الإنترنت وبعد أول محادثة بيننا طلب منى الزواج، مكنتش مصدقة طبعًا بس هو أكدلى إنه فعلا عاوزنا نتجوز وفعلا وافقت واتجوزنا وعندى ثلاثة أبناء منه، وفى البيت بنتكلم لغتين روسى وعربى مع أولادنا والحمد لله متفاهمين جدًا".

"وأنا عندى ثلاث سنين بدأت فى تصميم الأزياء"، هو ما قالته فيرا عن حكايتها مع تصميم الأزياء، حيث قالت: "وأنا عندى 3 سنين مسكت المقص وجربت أقص ملاية سرير كانت فى بيتنا وأهلى استغربوا جدا إزاى طفلة صغيرة تعمل كده وفعلا بدأت ومن هنا عرفوا إنى بحب التصميم والخياطة ولما كبرت اشتغلت فى المسرح فى تصميم الأزياء ثم انتقلت لمصر وفتحت مشروعى هنا ".

وأضافت: "بنات مصر محتاجين يعرفوا شوية عن الفاشون والأزياء والتريندات، أغلبهم بيلبسوا أى حاجة من المحلات وده مش صح لازم اعرف المناسب لجسمى والمناسبة اللى رايحالها ايه مش أى حاجة ألبسها، أنا بعمل أزياء للمحجبات ومحتشمة ومناسبة جدا ليهم ولبسى كله بعمل لنفسى ".

وعن الراجل المصري  قالت فيرا: "الراجل المصرى أقوى وأحن رجل فى العالم بينتمى لعائلته وبيته ولأولاده ، الرجل المصرى بعد الطلاق نفسيته بتتعب وبيتأثر غير الزوج الأجنبى ممكن يكون ده عادى بالنسبة له ويتجوز تانى، لكن الزوج المصرى حنين ، يمكن انتوا متعرفوش ده لكن هو من جواه كدا ومش ظاهر من برا، بالنسبة للأكلات المصرية فأنا بعرف أطبخ مصرى زى المحشى والملوخية والبط وكل حاجة وبحب الأكل المصرى جدًا".

وتابعت: "هنا فى مصر كل حاجة زيادة الأكل زيادة التوابل زيادة السكر زيادة حتى الحب زيادة، عشان كده أنا بحب مصر وبحب أهلها مفيش فى طيبتهم وذكائهم وقوتهم".