وزير التعليم يوجه رسالة لأهالى وطلاب الثانوية العامة عبر تليفزيون اليوم السابع: محدش يقدر يقول على امتحان العربى "صعب" والنتيجة بعد أسبوع.. ويشدد: ابعدوا عن السوشيال ودوشتها.. وهذا الرد على جمع "حليب"

قال الدكتور طارق شوقى، وزير التربية والتعليم، أن الوزارة ستستشير المركز القومى للامتحانات لأنه المنوط بالإجابة على جمع كلمة "حليب" والتى أثارت جدل بين طلاب الثانوية العامة ، حيث جاء رد الوزير فى تغطية أعدها محمد محسوب، وقدمها هشام عبدالتواب.

وأضاف وزير التعليم فى تصريحات خاصة لتليفزيون اليوم السابع: الطالب لو سأل زمايله هو جاوب كام سؤال دا أقيم ليه وأفيد.

وتابع الوزير : اللى كان بيحصل معانا قبل كدا علشان الكل كان بيحضر لنفس الأسئلة اللى كلنا كنا متآلفين معاها فكان أكتر من 30% من دفعة الثانوية بتجيب مجموع أكبر من 95% وعلشان كدا المجاميع دى كان مبالغ فيها وعاملة أزمة فى التنسيق ولا تعبر عن مهارة.

وقال الوزير: الأولاد اللى بتمتحن دى عندهم مهارة كبيرة واتعلموا كويس كدا والدليل دخولهم على المنصات الرقمية وبقولهم ماتقيسوش نجاحكم فى الامتحانات بالمسطرة القديمة وياريت أولياء الأمور ميضغطوش عليهم برضوا بالمسطرة القديمة ودى نقطة مهمة للغاية، وهيبان الإنجاز بتاعهم لما النتيجة تطلع وإبنهم هيدخل الكلية اللى عايزها.

وقال الدكتور طارق شوقى، إن الوزارة تابعت امتحانات الثانوية العامة  عبر غرفة مركزية، موضحاً أن الغرفة كان بها كافة الجهات المعنية.

وأضاف طارق شوقى أن امتحانات الثانوية العامة اليوم مرت بسلام من حيث نقل أوراق الامتحان، والغش الإلكترونى وغير ذلك، مؤكداً أنه تم ضبط طالبين أثناء قيامهما الغش.

وتابع الوزير: محدش يقدر يقول على امتحان اللغة العربية صعب خاصة إننا مدرسناش عينة كافية من الطلاب، مضيفا "الامتحان معمول علشان يميز بين الطالب المجتهد وغير المجتهد".

وقال الوزير الامتحان لا يقاس بحل جميع الأسئلة زمان لأن الرعب بيجى لما بقول للطالب إنت وحش لكن الامتحان لو صعب هيكون على الكل ولو سهل هيكون على الكل".

وقال الوزير: لو الشريحة العالية حلت بين 40 و50 سؤالا من 60 سؤالا فى اللغة العربية فبتكون دى النسبة والتناسب مش الإجابة على الـ60 سؤالا.

قال الدكتور طارق شوقى، وزير التربية والتعليم، : لو كان الطلاب امتحنوا على التابلت كان زمان النتيجة ظهرت دلوقتى مكناش هنستنى لما الورق يجى من الجمهورية كلها بالطيارات علشان نصححه. وأضاف طارق شوقى : نتيجة امتحان اللغة العربية ستظهر بعد أسبوع من الآن ويمكننا طمأنة الطلاب بعد أسبوع من الآن.

وتابع وزير التعليم: التنسيق هيستجيب على الكيرف الخاص بالنتيجة وهيتم تحديده عليه والتنسيق سيستجيب للمجاميع الجديدة فى الثانوية.

وقال وزير التعليم: بقول للطلاب انسوا الثقافة اللى اتعودتوا عليها وفكرة تقفيل الامتحان كعلامة إنك حليت حلو ولا وحش وحاول بس تحل أكبر عدد من الأسئلة الإجابات الصحيحة ومتبقاش منزعج لو محلتش الامتحان كله لانك متعرفش زميلك اللى جنبك حل كام سؤال.

وتابع : ممكن الطالب اللى حل 50 سؤال النهاردة فى اللغة العربية بس كلهم صح أفضل من اللى حصل 60 فيهم غلط كتير.

ووجه وزير التربية والتعليم رسالة طمأنينة لطلاب الثانوية العامة عبر تليفزيون اليوم السابع مؤكداً أن الطالب الذى يغش لن ينافس المجتهد متابعاً : علشان أجيب درجة كويسة لازم أركز 3 ساعات مرمش".

وتابع الوزير : الأهالى اللى خايفين اللى غشوا وهما عدد صغير وإنهم هينافسوا ولادهم فى المجموع دا مش هيحصل لسببين الولاد دى مش عارفة أن فيه نماذج مختلفة للامتحان وإن الحلول اللى بتجيلهم دى لا تنطبق غير على النموذج اللى صوروه وبالتالى كل الإجابات اللى كتبوها غلط، فملتنفتش ليهم خالص وسيبهم لينا".

وتابع : الجملة التانية وهى الامتحان طويل أنا وإنت منقدرش نحكم على الامتحان ونقول الامتحان طويل ولازم ناخد عينة كبيرة علشان نقدر نقول كدا لأن الطالب الشاطر شايفه سهل والطالب اللى مش مذاكر هيشوفه صعب.

ووجه وزير التربية والتعليم رسالة ونصيحة لطلاب الثانوية العامة قائلاً : مفيش داعى للتوتر لأن الامتحانات من الناحية اللوجستية ماشية كويس جداً وموضوع الغش دا علمنا ليه كل الاحتياطات علشان لا يؤثر على فرص كل الطلاب المجتهدة بأى شكل من الأشكال وانسوه خالص ومتابعوش السوشيال ميديا ولا الدوشة دي":.

وتابع : ياريت كلنا نركز على إعطاء الطلاب أكبر عدد من الوقت للهدوء وحل أكبر عدد من الأسئلة وميهموش خالص المجموع النهائى كام".

وقال الوزير : إحنا بعتنا تعليمات مشددة لرؤساء اللجان أن ورق الأسئلة ميتأخرش نهائى ولا دقيقة، وإذا تأخر يعطى الطلاب وقت كافى للإجابة ووقت الامتحان كاملا ويعطى هذا الوقت لهم.

وتابع : ياريت أولياء الأمور يتفقهوا أن طريقة التصحيح الجديدة مش هتهدر فرص دخول أولادهم الجامعة اللى عايزينها.