أحمد عز: عيب أنى أقول أنا "نمبر وان" فى وجود عادل إمام والفخرانى والسقا

قال الفنان أحمد عز، إن عرض فيلم العارف كان جيدا وأتمنى أن نكون عملنا حاجة برة الصندوق، وأتمنى نرجع مرة تانية لما قبل كورونا والمجهود الذى بذل في الفيلم ظهر واضحا للناس.

 

وأضاف، خلال مداخلة هاتفية ببرنامج يحدث في مصر مع الإعلامى شريف عامر: فكرة إنى أعمل فيلم ومستواه التقنى يكون أقل ده شئ غير وارد تماما، واستفز من فكرة أن فيلم خواجة لازم يكون أحسن، هما بيشتغلوا بنفس المعدة اللى بنشتغل بيها، ولكن المسألة مسألة تنظيم.
 

وتابع: "تايتل نمبر وان مش بتاع أي حد، وتاريخ الفنان في النهاية هو اللى يقيمه وشوفت العظماء بتوع زمان ما حدش فيهم قال إنه نمبر وان وعاشرت جيل أحمد زكى والفنان نور الشريف، ونور الشريف أصر أن اسمى يتكتب قبل اسمه في فيلم مسجون ترانزيت مع أنى كنت رافض، وعيب أنى أقول إنى نمبر وان في وجود عادل إمام والفخرانى وكريم عبد العزيز وهنيدى والسقا.. خلى الجمهور هو اللى يقول، طيب أستاذ عادل إمام يقول إيه بقى؟! تعالى نشتغل واعمل اللى عليك وتاريخك هو اللى يحكم".

وكان قال الفنان أحمد عز لتلفزيون اليوم السابع أنه سعيد جدا بالعمل مع المخرج أحمد علاء وكل زملائه وأنه يتمني أن يحقق الفيلم نجاحا كبيرا وأن الشيء الذي جذبه في الفيلم هو كونه أكشن، بالإضافة إلى أن فكرته جديدة لأنه يتحدث عن الغزو الثقافي، مؤكدا أن الحروب لم تعد دبابة وطيارة بل هناك حروب أكثر تطورا يتم استخدمها من حولنا دون أن تظهر كونها خفية.