أشرف زكى: حلا شيحة مشطوبة من النقابة وكلمتنى بدل المرة 10 عشان ترجع

قال الدكتور أشرف زكي، نقيب المهن التمثيلية، إنه انزعج من الكلام الذي أعلنته الفنانة حلا شيحة بشأن الفيديو كليب الذي ظهرت فيه مع الفنان تامر حسني، مشيرا إلى أن ما حدث درس كبير للجميع، خاصة عندما يتعلق الأمر ببعض الناس ممن يحرمون الفن، ثم يعودون إلى الشاشات مرة أخرى.

وأضاف، خلال مداخلة مع الإعلامي عمرو أديب ببرنامج "الحكاية" الذي يذاع على قناة "MBC مصر": "لا عودة للناس دي تاني ولا مكان لهم في النقابة، والسيدة صاحبة هذه الحادثة لا مكان لها في النقابة، وهي كلمتني بدل المرة 10، واحنا غلطنا لما قبلنا عودتها، وأنا أعتذر إنى قبلت عودتها، ولا مكان لمن يفعل مثل هذه الأفعال بالنقابة، هي مش موجودة في النقابة، وكانت مشطوبة أساسا من النقابة، وكنا نسير في إجراءات عودتها".

وقال: "الناس اللي عاوزين يرجعونا مليون سنة لورا يروحوا يشوفوا حالهم، والفن والموهبة والمهنة العظيمة اللي بنشتغلها متهونش عليها ولا تستحق مننا أننا نعمل فيها كدة، وأنا مرة سألت الشيخ الشعراوي هل الفن حرام؟ فرد عليا فيما معناه إن الفن رسالة".

ومن جانبه علق الإعلامي عمرو أديب على أزمة الفنانة حلا شيحة والفنان تامر حسني، بعد عرض الفيديو كليب الذي جمعهما، والتي كانت جزءا من فيلم "مش أنا"، وقال: "حاسس إن الموضوع مش صدفة، يعني دلوقتي أزمة حلا، وقبلها أزمة البوركيني، وبعدها شوية جدل على الحجاب، حسيت إننا رجعنا لأيام زمان، وطبعا في كذا شيخ دخلوا في الموضوع وتحدثوا عن فضيلة المرأة".

وأضاف: "الحوار ده احنا شوفناه قبل كدة، هل دي كلها صدف، معرفش، الفار لعب في عبي، لأنها موجة طالعة ومجموعة صدف مع بعض، أنا شايف إن اللي عاوز يمثل يمثل، واللي عاوز يقلع الحجاب يقلع واللي حابب يلبسه براحته، أنا شوفت فيلم تامر، ومشوفتش فيه أي أشياء خارجة، وأغلب أفلام تامر مفيهاش حاجة خارجة، مفيش حاجة شوفتها تزعج حلا".

وقال: "في طقس بيحصل من مريحني، اللي هي موجة حاجات تظهر مرة واحدة، عشان يدخل المجتمع في دوائر مظلمة".