أحمد ناجى لتليفزيون اليوم السابع: لو أنا في أوضة اللبس كنت حضنت الشناوى بعد الخطأ

قال الكابتن أحمد ناجي مدرب حراس مرمى سموحة ومدرب حراس مرمى النادى الأهلى ومنتخب مصر السابق، إن عتاب الجماهير لمحمد الشناوى حارس الأهلى على الخطأ الذى ارتكبه أمس في مباراة بيراميدز هو عتاب على قدر محبة الناس له، مضيفاً:" الشناوي له إنجازات كبيرة جدا مع النادي الاهلي ومع المنتخب القومي وفي كاس العالم كان هو واحد من الناس صاحب الأسهم العالية".

وأضاف الكابتن أحمد ناجى خلال لقائه على تليفزيون اليوم السابع:" الشناوى حارس كبير، وطبيعى أن تحصل أخطاء من حارس المرمى، مفيش حارس بجناحين، مفيش حارس معصوم من الأخطاء، وفي بطولة الأمم الأفريقية الأخيرة، كان محمد الشناوى مع طارق حامد أصحاب إنجاز في البطولة وحصلوا على إشادة كبيرة.

وتابع مدرب حراس مرمى سموحة ومدرب حراس مرمى النادى الأهلى ومنتخب مصر السابق:" مشوار محمد الشناوى مع النادي الاهلي كله بطولات وإنجازات، والحقيقة أن الشناوى حارس يخطأ اخطاء مختلفة في فترات متباعدة وهذا طبيعى في كرة القدم بالنسبة لأى حارس سوبر، ولو أنا في أوضة اللبس بعد خطأ الشناوى أمس كنت هحضنه وبعد يومين تلاتة نحلل أزاى عمل الخطأ دا ونشوف أزاى نتفادى دا في المباريات الجاية".

وأضاف:" محمد الشناوى سيكون أحسن واحد في الملعب المباراة الجاية للأهلى، هو شخصيته كده عنده شخصية يعني قوية جدا، الشناوى حارس كبير، والحارس الكبير لا يتأثر باخطائه".