ريهام سعيد تعلن اعتزالها تقديم البرامج والعودة للتمثيل من جديد

أعلنت المذيعة ريهام سعيد، اعتزالها من تقديم البرامج، وعودتها للتمثيل من جديد بعد أن كانت اعتزلت التمثيل عام 2015، وكتبت بوست عبر حسابها الشخصى بموقع انستجرام، قائلة: "فكرت كتير قبل ما اكتب البوست ده، أنا اعتزلت التمثيل سنة 2015 لأني حسيت إن صاحب بالين كداب وإن التمثيل مأثر على مسيرة الخير إلى ابتديتها من سنين طويلة عشان الوقت والمجهود إلى بعمله، لكن عشقى للتمثيل إلى هو دراستى ومهنتى الأولى قبل الإعلام رجعت أمثل تانى وأنا لسه فى نظر المخرجين والمنتجين مذيعة عايزة تمثل، كنت عارفة إن عشان أخد مكان كممثلة لازم أسيب الإعلام زى - مع حفظ الألقاب- داليا البحيرى و بسمة ودينًا فواد ودينا الشربينى وغيرهم بس مكنتش قادرة أسيب رسالتي إلي كانت مهمة أوي وقتها، أنا حصل لي مشاكل كتير من المهنة دي بتأثير باطل من السوشيال ميديا من منافسين وأعداء بسبب المشاهدة العالية جدا والنجاح".

ريهام سعيد فى منشورها

وأضافت سعيد "أنا تعبت وحاسة إنى قدمت كل إلي ممكن يتقدم والدولة عاملة إلي عليها و مش محتاجين دور المجتمع المدني في مساعدة الناس ولكن أنا ليا الشرف إني اشتغلت في المهنة العظيمة دي إلي ليها رسالة سامية وعظيمة وليا الشرف إني كنت إعلامية في أصعب وقت مر علي الإعلاميين أيام حكم الإخوان والحمد لله كان لينا موقف واضح ومتغيرش ولا دقيقة، أنا الحمد لله حققت فى التمثيل وكل إلي اشتغلته علم مع الناس واشتغلت أعمال كلها قيمه بس بعد ما جالي السكر وشوية مشاكل تانية قررت أعمل إلي بحبه أنا بكل أسف بعلن اعتزالي الإعلام تماما وهركز كممثلة وهطلب من الدكتور أشرف زكي إنه يساعدني إني إغير الفكرة الموجودة في أذهان المخرجين والمنتجين إني مذيعة".

ريهام سعيد 

وتابعت: "ورسالة للأستاذة كاملة أبو ذكرى ومش مكسوفة نفسي أوي أمثل معاكي حتي لو مشهد ده من أحلامي، خطوة صعبة وفيها ريسك كبير بس على الأقل أجرى ورا حلمي حتي وأنا في السن ده، جه الوقت اني استمتع بالي بعمله وبحبه خصوصا لما يكون في عصر ولا فيه واسطة ولا محسوبية إلي هيجتهد هيوصل، متسيبوش حلمكم مهما فات الوقت، بشكر جمهورى من الأمهات والشباب والأطفال إلي دائما بيدعموني وحبوا برامجى وتعلموا منها وبشكر ربنا علي عشرين سنة إداني الفرصة فيهم إني أقضي حوائج الناس وأقدم كل ما هو مفيد، فخورة بكل حلقة وبكل حرف قدمته 20 سنة تعب وسهر وتصميم علي تقديم الحقيقة، أنا آسفه ليكوا بس التمثيل رسالة برضوا وهو حلمي الأساسي إلي تأخرت أوي عشان احققه يا رب وفقني وساعدني".