"راجل و2 ستات" يناقش ارتباط الرجل بالست الذكية.. شريهان أبوالحسن: لو واثق بنفسه مش هيتوتر وهذه مواصفات المرأة الذكية.. هيدى كرم: الرجل بيتوتر من الست الذكية.. أحمد صلاح حسنى: اللى كلامها عن الفلوس قليل ست مريحة

ناقش برنامج راجل و2 ستات المذاع على قناة on، تقديم الإعلامية شريهان أبو الحسن والفنانة هيدى كرم، والفنان أحمد صلاح حسنى، مدى قبول الرجل للزوجة الذكية من عدمه، وهل تنجح الزيجات من المرأة التى تتميز بالذكاء أم لا؟ وهل الزوجة الذكية تثير قلق زوجها وتجعله أكثر توترا.

من ناحيتها، علقت الإعلامية شريهان أبو الحسن على سؤال البرنامج، هل الراجل يقلق من السيدة الذكية؟ قائلة: "لو الرجل عنده قدرة وثقة فى النفس مش هيتوتر من العلاقة دى".

وأضافت خلال برنامجها راجل و2 ستات: "الست متكتبش عليها ولا بالضرورة أن لازم تكون هى الضعيفة والراجل يبان فى كل الوقت أنه الأقوى.. وهناك ذكاء خاص بيطالبوا الرجال بيه الستات أنه يتمتعوا بيه، فبيقولك إن الست الذكية اللى بتحسس جوزها إنه كل حاجة وأعظم واحد".

وعلق الفنان أحمد صلاح حسنى على سؤال البرنامج، هل الراجل يقلق من السيدة الذكية، قائلا: "أعتقد أن الراجل لو مش واثق فى نفسه هيقع فى المشكلة دى".

وعلقت الفنانة هيدى كرم: "أعتقد أن الست الذكية بتوتر الراجل ولما بيكون هناك واحدة ناجحة جدا فى شغلها الراجل بيتوتر من الذكاء بتاعها جدا.. وبحس أن الراجل بطبيعته التكوينية بيحب يحس أنه هو الأقوى والأذكى والأحكم والعقلانى، لأن هو خلقته كده.. وممكن يقابل سيدات كتيرة ذكية والراجل ميقدرش يدخل فى علاقة معها".

قالت الفنانة هيدى كرم، إن هناك دراسة أجريت على 75% من الرجال، عن حبهم للسيدة الذكية وكان ردهم "طبعا"، والدراسة جعلت مع كل رجل سيدة ذكية، وتم تقسيمهم إلى قسمين، الأول قالوا لهم أن السيدات تم عمل لهم اختبار ذكاء، وتبين أن السيدات أذكى من الرجال، الجزء الآخر قالوا لهم إن الستات تم عمل لهن اختبار ذكاء وطلع أنهن أقل ذكاء من الرجال.

وأضافت خلال برنامجها: "والرجالة اللى كانوا قاعدين مع الستات اللى اذكى منهم كانوا متوترين جدا.. وبيتكلموا قليل جدا ومش عارفين ياخدوا راحتهم فى الكلام وبعد ما خلصوا الرجالة قالت ان السيدات مش جيدة، واما اللى كانوا مع الست اللى اقل منهم ذكاء كانوا واخدين راحتهم جدا وهذا يبين أن الراجل بيتوتر فعلا من الست الذكية".

وعلقت: "لو أنت بتحبيه وتحافظى على الراجل لازم تعامليه فى ضوء أنه هو الكاريزما ولا تبينى أنك تكونى غبية أو ذكية عنه".

وقالت الإعلامية شريهان أبو الحسن، إن دراسة أمريكية أجريت حول مواصفات الزوجة الذكية التى يراها الرجال سيدة نموذجية ومثالية، وتبين أن السيدة الذكية لا تطلب المال، ولا تطلب منه أن يتغير، ولا أن يتخلى عن أصدقائه، أو الامتناع عن التواصل مع الأخريات، ولا توضيح كل شيء.

وأضافت: "الست بالمواصفات دى مش ذكية خالص، وتعتبر "كنبة".

وعلق الفنان أحمد صلاح حسنى: "أول مرة أشوف دراسة أوافق عليها فى كل طلباتها.. وهى دى الست الوحيدة اللى هيجيلها كل حاجة.. الست اللى كلامها عن الفلوس قليل تعتبر ذكية ومريحة.. وطلبات البيت والولاد ده أمر مفروغ منه.. ولكن لا تطلب المال عشان تغير عربية ولا الكلام ده".

فيما علقت الفنانة هيدى كرم: "يعنى إيه الست متطلبش المال، طيب لو احتاجت حاجة هتجيبها من فين.. لكن أنا مع باقى الحاجات التانية من الدراسة".