نور الشربينى تكشف تفاصيل فوزها ببطولة العالم للإسكواش للمرة الخامسة

أكدت نور الشربينى بطلة العالم فى الإسكواش، أن حصدها للقب الخامس كبطلة العالم فى الإسكواش يشعرها بالسعادة والفخر، قائلة: "أكيد طبعًا مبسوطة جدًا وشعور لا يوصف أن أحصد مثل هذا اللقب للمرة الخامسة على التوالى فى بطولة كبيرة".

وحول مشاعرها بعد فوزها على منافتسها المصرية نوران جوهر واختلافها لو كان المنافس من دولة أخرى، أوضحت فى مداخلة هاتفية خلال برنامج "كلمة أخيرة" الذى تقدمه الإعلامية لميس الحديدى على قناة "ON": "الموضوع ده اختلف كتير وبقى فيه مصريين كويسين فغصب عن الواحد هيقابل مصرى، والبطولات اللى أنا كسبتها الخمسة أربعة منهم كنت بلاعب فى النهائى بتاعهم حد مصرى".

واستطردت: "الموضوع مختلف وبنحاول نتعود عليه لأن خلاص هنقابل مصريين كتير لأنهم أبطال فى الإسكواش وفيه بنات وأولاد كتير فى اللعبة، ووالدى أصر يحضر معايا البطولة ويسافر مخصوص رغم صعوبة الإجراءات، متابعة: "كنت فى فقاعة طبية تحسبًا لكورونا ولن نتعامل مع أحد لكن والدى فى المقابل كان عايز يبقى معايا فى البطولة، وحضرها معايا من أول لآخر يوم، وهو سافر معايا كل البطولات".

وكشفت أن أول مكالمة أجرتها بعد تتويجها كانت لوالدتها وشقيقها ثم أعقبها مكالمات مع المدربين وزملاء اللعبة، مضيفة: "رجعت على الإسكندرية على طول بعد تتويجي".