شريهان أبو الحسن بـ"راجل و2 ستات": "الصراحة بتزعل.. خاصة القريبين مننا".. هيدى كرم: 61% من الرجال أثناء الخناق بيحتاجوا لمجهود مضاعف عشان يسمعوا الست.. أحمد صلاح حسنى: الإنسان لو ساب نفسه للسلبيات هيغرق فيها

قالت الإعلامية شريهان أبو الحسن: "الصراحة بتزعل وبتزعل الناس القريبين مننا، والمجاملات بيبقى دمها خفيف وحنينة على القلب وبتطبطب على الناس، ومش عيب".

وأضافت، خلال برنامجها راجل و2 ستات المذاع على قناة on، تقديم الفنانة هيدى كرم، والفنان أحمد صلاح حسنى: "وبتزعل الناس القريبين وإحنا بنفتكر أنها مبتزعلش وحقيقة أنها بتوجع.. كمثال لو تخنت 3 أو 4 كيلو هيدى مش هتيجى تقولها فى وشي كدة مالك تخنتى كدة ليه وبقيتى مبعجرة"، وترد هيدى "عمرى ما أقول كده مقدرش".

وتابعت الإعلامية شريهان أبو الحسن: "المفروض الرجالة لما تلاقى مراتها تخنت ورادّة.. ميقولهاش فى وشها مالك تخنتى كده ليه".

وعلقت الفنانة هيدى كرم: "وساعات الكلام بيبقى زى الطوب ودم تقيل.. والرجالة ساعات بتقول للست مالك تخنتى كده ليه وعند الرجالة مجموعة جمل بيبقى دمها تقيل قوى".

وعلق الفنان أحمد صلاح حسنى: "الصراحة ديما ليها مكان".

وقالت الفنانة هيدى كرم، إن هناك دراسة تؤكد أن 61% من الرجال أثناء الخناق بيحتاجوا لمجهود مضاعف عشان يسمعوا الست.

وأضافت خلال برنامجها راجل و2 ستات : "الرجالة بيفلتروا ويفصلوا.. ولكن الست الموضوع مش بيخلص معاهم خالص.. ودى مش شطارة منكم أنكم تكبروا.. والراجل لازم يسمع عشان يقتنع".

وعلقت الإعلامية شريهان أبو الحسن: "قبل ما أقنعك حس بيا.. والرجالة طول الوقت عاوزين أن إحنا نشغل مكنة الإقناع ولكن قرب منى شعوريا، والرجالة ليهم ضحكة وسط الخناقة ملهاش معنى".

وعلق الفنان أحمد صلاح حسنى: "الستات كده كده.. لو اتكلمنا هيزعلوا ولو سكتنا برضو هيزعلوا.. والرجالة فى هذا الوقت مش عارفين يروحوا فين".

فيما علق الفنان أحمد صلاح حسنى، على فقرة سؤال وسؤال تحت عنوان "التفكير السلبى" قائلا: "الإنسان لو ساب نفسه للسلبيات هيغرق فيها".

وأضاف: "وغصب عننا مخك بيروح للتفكير السلبى، لما بتبقى مضايق أو قلقان بتروح دماغك فى حتت سيئة.

وعلقت الإعلامية شريهان أبو الحسن: "خليكى إيجابى وبلاش تفكر فى السلبية لأنها بتجيلك، والعلماء قالوا بلاش التفكير السلبى وخليك إيجابى وفكر بكل الإيجابيات وبلاش السلبية ولما تفكر فى السلبيات بتجيلك.. وساعات مبتقدرش تعمل ده عمليا ولكن بنحاول نعمل كده.. ونتمرن على كدة".

وقالت الفنانة هيدى كرم: "مش بفكر سلبى ولكن بفكر كتير وفى تفاصيل كتير.. وكل التفاصيل السلبية والإيجابية بتاخد وقت كبير، ولكن مش بفكر سلبى.. أنا شخصية قلوقة وبفكر".