منة عرفة لتليفزيون اليوم السابع: بغير على زوجى واللى تقرب منه يا ويلها

منة عرفة ومحمود المهدى

سارة صلاح

الثلاثاء، 06 يوليو 2021 05:00 م

حلت الفنانة منة عرفة وزوجها محمود المهدى ضيفين على تليفزيون اليوم السابع خلال برنامج "ملوك الترند" مع الزميل عادل عبد الله، وذلك فى أول ظهور للثنائى بعد عقد قرانهما الأسبوع الماضى، وتحدث منة عرفة عن غيرتها الشديدة على زوجها.

وعلقت منة قائلة: "أنا غيورة أوى ولو واحدة دخلت كتبت كومنت عند محمود على إنستجرام بدخل أرد وأقولها إنتى كاتبة إيه، أنا مجنونة وفى الأول مكنتش بغير، ومع مرور الوقت بينا بغير أكتر وأكتر وأنا برج الثور لما بحب أوى بحب الحاجة تكون بتعتى أنا بس".

وأضافت "كنا عاملين فيديو تيك توك كوميدى المهم آخر الفيديو بهزار بيقتلنى فى بنت بتكتب على كل فيديو لمحمود حبيبى بحبك وكتبت له كده خلصت من منة اتجوزنى، دخلت كتبت ليها إنتى بتقولى كده والبنت خافت منى عشان كتبت الكومنت وأنا بثق في محمود جدا بس بغير عليه".

وحكت منة عرفة كواليس المقابلة الأولى بينها وبين زوجها محمود المهدى والتى كانت فى شركة الإنتاج لحظة التعاقد على أحد الأفلام وقالت: "كنت وقتها مش طايقة نفسى وهو كمان مكنش طايقنى لأنه كان شايفنى تنكة ومغرورة، وبعد ما مضيته، اتقابلنا فى التصوير كتير ومكنش فيه إعجاب طوال فترة التصوير، حتى جاء آخر يومين حصلت فيهم شرارة الإعجاب والانجذاب".

وبدوره تحدث محمود المهدى عن تطور العلاقة مع منة عرفة موضحاً: "بدأ يبقى معانا أرقام بعض من سنة تقريباً فى آخر يومين تصوير، وفى أحد الأيام لقيت صاحبة منة بتتصل بيا وقالت لى عاوزة أعرف دلوقتى انت ومنة إيه نظامكوا؟ وسالتنى أنت بتحب منة ولا لأ، سكت شوية وردت، أنا بصراحة أعجبت بيها فى الفترة اللى فاتت واعترفت، وكملت منة وقلت لها أنا معجب بيكى واتكسفت شوية وقابلنا بعض تانى يوم واتعشينا عشوة رومانسية وكانت بداية القصة الحقيقة".

واستكملت منة عرفة الحديث وقالت إنهما ارتاحوا لبعضهما بعدما وجدا أشياء كثيرة متشابهة بينهما موضحة: "اللى شدنى ليه مش عارفة والله لإنى بالفعل كنت شفته واتكملت معاه ولكن آخر يومين تصوير حسيت إنى شفته بشكل مختلف عن المرات اللى قبل كدا، وبعدين حسيت إنى عاوزة أكلمه لإنى شفته في موقف تانى كأنه شخص تانى مختلف تماما عن أول مرة شفته، فأول مرة شفته مكنتش مرتاحة له لكن فى آخر يومين تصوير بدأت انجذبله واعجب بيه".