عمرو أديب: مصر نجحت بنسبة 99.9% من نقل أزمة السد من المسرح الإفريقى للدولى

قال الإعلامى عمرو أديب، إن خطاب وزير الخارجية المصرى سامح شكرى في جلسة فى مجلس الأمن بشأن سد النهضة كان قويا، وأن مصر نجحت بنسبة 99.9% أن تنقل أزمة سد النهضة من المسرح الإفريقى إلى المسرح الدولى.

وأضاف، خلال برنامج "الحكاية" الذى يذاع على قناة "mbc مصر": "سامح شكرى بيقولهم أنا جاى المرة دى أقول اللى حصل، المرة الجاية محدش يقولى هو جرا ليه، وإحنا فى مصر والسودان وكمواطنين بالنسبة للقضية دى، درجة حرارتنا عالية أوى، لكن العالم درجة حرارته 30 فهرنهيت، العالم بيكلمنا كأن المشكلة دى حصلت أول امبارح، بيقولوا اتفاوضوا واتكلموا، لأ أنا جايلك لأعلى مراحل الدبلوماسية فى العالم علشان اشتكي".

وقال: "الناس فى الدول دى مش حاسة أوى بالأزمة، مندوب أثيوبيا كان بيستعبط، بيعتذر لأعضاء المجلس وبيقولهم احنا جينا عشان متفقين، وآبى أحمد يقولك مفيش خطر على المصريين والسودانيين من الملء، طب ما تيجى نكتب، يقولك لأ، إمبارح هما بيكلموا العالم بيقولك مصر التى لا تشبع، بيوصل للعالم صورة غلط".

وتابع: "بعد كام يوم، لو تم تبنى القرار التونسى، أو يطلع بيان رئاسة، فى الحالتين أن قصاد الرجوع لمفاوضات لمدة 6 أشهر، والمندوب الروسى كمان امبارح كلامه كان ينقط، بيقولك محدش يهدد، والكلام كله يكون فى إطار المفاوضات، وفى الوقت نفسه تلاقيهم قالبين الدنيا على تيجراى وأفغانستان، العالم لا يتلفت إلا للمصائب، هما مش شايفين المصيبة بتاعتنا".