سألنا البنات ندمتى على إيه فى تجهيزات الفرح؟ قلة النوم والتوتر الأبرز

مع اقتراب موعد الزفاف تعانى الكثير من الفتيات خلال فترة التحضيرات قبل الفرح، ويجدن صعوبة في القيام بالكثير من الأمور في فترة قصيرة، بدءا من تجهيزات الشقة، ووصولا إلى التجهيزات الخاصة بفستان الفرح والشعر والمكياج. 

وتعد تجهيزات العروس من أهم الأشياء التي يجب وضعها في الحسبان، لتجنب الوقوع في أخطاء، قد تندم عليها بعد مرور يومها الكبير والمميز، ولتلافي تلك الأخطاء سألنا المتزوجات حديثا عن أبرز الأخطاء التي وقعن فيها خلال تجهيزات الفرح، وجاءت إجابتهن كالتالى:

أجابت فاطمة: "كان نفسي أصور فيديوهات للتجهيزات نفسها واحنا بنعملها عشان افتكر المرمطة اللي كنا فيها قبل الفرح، وإزاي بقى يوم جميل فى الآخر، صوري كل حاجة لحظة بلحظة وانبسطي على قد ما تقدري، فى الآخر اللي بيفضل الصور والفيديوهات والذكريات الحلوة".

تجيهزات الفرح

وقدمت ماجى بعض النصائح للمقبلات على الزواج: "أهم حاجة الهدوء وعدم التوتر وتنبسطوا آخر حاجة، واختارى الى يفرحك ويعجبك حتى لو فى معترضين، يوم وليلة بيعدوا زى الحلم الجميل، فى تجهيزات البيت هاتوا اللى تقدروا عليه من الحاجات اللى بتسهل الدنيا فى المطبخ أو التنظيف".

وعن أخطائها خلال تجهيزات الفرح قالت نهال: "منمتش كويس أو بمعني أصح منمتش خالص يومها، ويوم الفرح كان شكلي مرهق وقولت للراجل يخلص الفرح بدري عشان أروح أنام".

تحضيرات حفل الزفاف

وقالت مونيكا: "ندمت إن فى حاجات كتير أوى كنت بأجلها، وأقول مش مهم بعد الجواز نبقى نجيبها، وبعد الجواز محدش بيجيب حاجة لأن المصاريف بتكتر".

حفلات الزفاف

وبالنسبة لريموندا: "هى مش فى التجهيزات، ندمانة أنى استلمت الفستان بدرى أسبوعين، ومقستش الفستان قبل الفرح واكتشفت يوم الفرح إنى خسيت على الفستان، والفستان بقى واسع، قيسى الفستان قبل الفرح بيوم على الأقل علشان لو فى حاجة تلحقى تصلحيها".