ليلى علوى لـ منى الشاذلى: أنا مش شايفة نفسى حلوة

قالت النجمة ليلى علوى إنها لم ترض يومًا أن تلعب دور الفتاة الجميلة فقط، وقررت أن تلعب شخصيات بعيدة عن شكلها، مضيفة: "الحمد لله راضية بنفسى بس مش شايفة نفسى من الحلوين، أو مش بفكر فى ده كتير، وكنت عايزة أدوار مختلفة عشان أجسد شخصية واحدة مش حلوة،  وبداية من عام 87 خدت قرار مش هعمل دول شبه التانى".

وكشفت ليلى علوى خلال استضافتها ببرنامج "معكم منى الشاذلى" الذى يذاع على فضائية CBC كواليس آخر أعمالها السينمائية "ماما حامل"، قائلة: "كلمونى وأنا فى الساحل قالوا إن فيه فيلم اسمه "ماما حامل"، ضحكت من الاسم ولما قريته عجبنى جدا، ولما عرفت إن فيه بيومى فؤاد وميرغنى ومحمد سلام قلت الدنيا هتولع".

وأضافت ليلى علوى: "أى واحدة تشوف الفيلم هتتمنى يكون زوجها بيومى فؤاد، عمل دوره حلو جدا، وهذا النموذج الذى يصارح شريكته بحبه دائمًا موجود فى الحقيقة رغم إن دول قليلين".

وقصت ليلى علوى ذكرياتها مع فيلم "المصير" للمخرج يوسف شاهين: "أيام فيلم المصير مش ممكن أنساها خاصة لحظة وقوفونا على السجادة الحمراء في مهرجان كان، وتكريم يوسف شاهين بالسعفة الذهبية عن مجمل أعماله، وكانت فرحة كبير لمصر والعرب".

وتابعت: "رئيسة لجنة التحكيم كانت عايزة تمنح جائزة للفيلم، لكن حدث شيء داخل اللجنة، في النهاية انتهت اللجنة لمنح يوسف شاهين السعفة الذهبية".