أحد طلاب مدرسة "أم محمد": كانت أمى.. ولو ماكنتش على البوابة بادخل خايف

قال محمد طلعت، أحد طلاب المدرسة التى تعمل بها السيدة عوضة مسعد القطبى، الشهيرة بـ"أم محمد"، التى تعمل فى إحدى مدارس مدينة بورسعيد منذ 55 عاما دون أن تحصل على أية إجازات، إنه تخرج من كلية الحقوق، متابعا: "لو ماكانتش هى اللى على البوابة ببقى داخل خايف، لأن هى اللى كانت بتطلعنى الفصل علشان ما كنتش بقف فى الطابور".

أكمل محمد طلعت، فى لقائه مع الإعلامى يوسف الحسينى، ببرنامج "التاسعة" الذى يذاع عبر القناة الأولى بالتليفزيون المصري: "وكانت بتطلع تاخدنى من الفصل من إيدى علشان تسلمنى لأمى، وأول ما دخلت الحضانة فى المدرسة كانت هى بالنسبة لى أمى، وكانت أمى بتكلمها كتير علشان تقعد وهى ماكنتش بتوافق".

وعلقت أم محمد، قائلة: "أنا كنت بشيله وعرفته وهو عنده سنتين ونص، ووالدته جابته هو وأخوه وأخته الصغيرة، أنا قلبى حبه جدا، لأنه من وهو طفل بشيله وبقى يقعد معايا وكان طفل هادى جدا".