توفيق عبدالحميد:الانزلاق الغضروفى بعدنى عن الفن ونزلت الصور عشان الشائعات

توفيق عبد الحميد فى مداخلة مع على الكشوطى

كتبت نوران جمال

الثلاثاء، 28 سبتمبر 2021 06:00 م

تحدث الفنان الكبير توفيق عبد الحميد عن سبب اختياره الصور التي نشرها عبر صفحته بموقع التواصل الإجتماعى برفقة كلبيه، خلال مداخلة هاتفية مع الكاتب الصحفي على الكشوطى على تلفزيون اليوم السابع: وقال “أنا أخترت الصور دى بالصدفة، أنا عندى انزلاق غضروفى وده مقصر على ضهرى ورجلى، وده سبب ابتعادى عن الفن الفترة دى وبيتعرض عليا شغل كتير جدا بس أنا مقدرش غير لما أتعافى”.

علي الكشوطي وتوفيق عبد الحميد

وتابع: “اللى حصل أن ابن اختى معاه مفتاح بيتى وهو طبيب، فهو جه وأنا نايم على ضهرى كده وهم بيحبوه برضه فجت صورة عفوية وتلقائية جدا بدون ترتيب أو تجهيز”.

وأضاف: “أنا قصدت من الصور إنى أرد على حاجة عملالى إزعاج بإن أنا كل شوية مطالب إنى أثبت أنى توفيق عبد الحميد، أو أن انا متهم إنى منتحل شخصية توفيق عبد الحميد، وده تسبب في إنى جمدت الصداقة تماما على صفحتى، وبعدين لاقيت ناس كتير واخدة الصفحة بتاعتى حتى الغلاف مع ان أنا الغلاف بتاعى مختاره عن عمد، مختار علم مصر وعلى اليمين قصيدة صلاح جاهين، وعلى الشمال تمثال نهضة مصر، انا قاصد الاختيار ده مش عشوائى، ودلالتها واضحة أنا معتز بمصريتى، واخترت اتنين اكتر حد كتب قصايد في حب مصر، وتمثال نهضة مصر الجامع بين التاريخ والحضارة القديمة والحداثة”.

علي الكشوطي وتوفيق عبد الحميد

وتابع عبد الحميد: “حتى اللى سرق الصفحات مش خد بس الاسم والصور، انا معنديش صور على صفحتى من أعمال ليا، لكن هم جابوا صور وبيتعاملوا مع الناس على أنهم أنا، فأنا مطالب تقول الوقت أثبت إنى توفيق عبد الحميد، وأنا لو ارتضيت إنى انتحل شخصية توفيق أيه يمنعنى اكدب وأقولك اه انا، والأخطر انه ممكن يتكلم مع حد ويقول حاجة تتحسب عليا، فأنا نزلت الصور عشان اقطع دابر السؤال المزعج ده”.

وكان قد أثار عددا من الصور نشرها الفنان الكبير توفيق عبد الحميد برفقة كلبيه عبر صفحته بموقع التواصل الاجتماعى، جدلا واسعا خلال الساعات الماضية، وكثرت الأقاويل حول صحة هذه الصور، وتعددت التساؤلات والشائعات، خاصة أن الفنان توفيق عبد الحميد ليس من الفنانين النشطاء على مواقع التواصل الاجتماعى.