بالفأس والجلابية ولا أجدعها مزراع.. رحلة أبطال ذوى القدرات الخاصة من القاهرة للريف

حلة أبطال ذوى القدرات الخاصة من القاهرة للريف

نهير عبدالنبي

الأحد، 05 سبتمبر 2021 12:00 م

فى الفترة الأخيرة، أثبت ذوو القدرات الخاصة مهاراتهم وقدراتهم العديدة فى الرياضة والغناء والرسم، ولكن لم تنته أحلامهم هنا، فمشروع حلم كان بداية انطلاقة جديدة ومختلفة لعالمهم الموازى والخروج للعالم الآخر والاندماج معهم، من خلال القضية 404 ومبادرة الريف السعيد.

القضية 404 هو أول تجربة لمسلسل أبطاله من ذوى القدرات الخاصة وهى فكرة السيناريست رامز عباس والمخرج محمد الأنصارى، حيث يناقش المسلسل قضايا ذوى القدرات الخاصة من التنمر والاستغلال والتحرش.

قال المخرج محمد الأنصارى لـ"اليوم السابع" إن ذوى القدرات الخاصة يقدروا يعملوا أى حاجة واحنا اللى بنتعلم منهم مش هما اللى بيتعلموا مننا، جاتلى فكرة المسلسل من صديقى الأصم السيناريست رامز عباس ، وقالى انا عندى قضية وعاوزك تناقشها قلت له ايه هى قالى قضية ذوى الهمم وعندى حجات كتير محتاجين نناقشها ونعرضها، قررنا نصور مسلسل كل ابطاله من ذوى القدرات وناقشنا قضايا مختلفة وده كله من خلال مبادرتنا عالم موازى واللى قررنا نخليه عالم مساوى مش موازى ونعمل دمج لذوى الهمم مع المجتمع وخصوصا فى الريف.

وتابع: جاتلنا فكرة رحلة لذوى الهمم في الريف عشان نعرف الناس بذوى الهمم ومواهبهم ومهاراتهم وإن الناس متخافش منهم وخصوصا أن الريف معندهمش ثقافة الاختلاف سواء في الشكل أو الكلام والأدهى إن بعض الأهالى في الريف لما بيكون عندهم طفل من ذوى الهمم بيخبوه عن الناس وبيستعروا منه.

واستطرد حديثه قائلا:روحنا محافظة المنوفية والناس استقبلتنا أحسن استقبال والأطفال اتبسطوا جدا وجربوا الزراعة والخبز وكل حاجات في الريف وعملنا فطار جماعى وفعلا الفكرة وصلت للناس كلها إن ذوى الهمم يقدروا يعملوا كل حاجة.

وانهى حديثه قائلا: ذوى الهمم انا جربتهم في التمثيل والاستعراض والغناء وكانوا شطار جدا وجربناهم في الريف وكانوا كويسين جدا يعنى الهدف إن انت لو عندك طفل من ذوى الهمم متخبيهوش عن الناس وتستعر منه، لو انت في ريف ممكن تستغل ابنك وتساعده وتخليه يبقى مزارع او نجار وممكن يكمل تعليمه ويبقى احسن واحد في الدنيا.