زياد كمال الطويل: والدى كان بيلحن للعندليب من غير ما يفكر.. وكرامته سبب وقف تعاونهما

أكد زياد كمال الطويل، نجل الملحن الراحل كمال الطويل، أن والده كان يقبل أي عمل للفنان الراحل عبد الحليم حافظ، وعبر قائلا: "الوحيد اللي كان بيلحن له من غير ما يفكر كان عبد الحليم".

وأضاف خلال لقائه مع الإعلامية منى الشاذلي، ببرنامج "معكم" الذي يذاع على قناة "cbc": "كل أغاني عبد الحليم اللي لحنها كمال الطويل كانت وقتها جديدة جدا، ودي كانت ميزة في مدرسة كمال الطويل هو والموجي، هما طوروا الأغنية المصرية، مع الاحتفاظ بمصريتها".

وقال: "كان في تعب ومجهود، احنا بنسمع الأغنية ومنعرفش علشان تطلع لنا حصل فيها إيه، كانوا بيقعدوا ليالي طويلة علشان يطلعوا أفضل ما عندهم".

وتابع: "أغنية بلاش عتاب، كانت آخر تعاون عاطفي بين كمال الطويل وعبد الحليم حافظ، لأن عبد الحليم كان دارس موسيقى وكان بيقود الفرقة في الحفلات، وأثناء البروفات كان عبد الحليم أيضا يتدخل في الفرقة، وكمال الطويل قاله لما يكون ليك ملاحظة قولها لي، لكن مش معقول أقول للموسيقيين يمين وأنت تقول شمال".

وقال: "كمال الطويل قاله أنا قولتلك مرة واتنين وتلاتة لكن مفيش فايدة، بقولك إيه، علشان منخسرش بعض كأصدقاء أنا هبطل أتعاون معاك فنيا، واحتفظوا بصداقتهم، وكرامة كمال الطويل كانت فوق كل شيء لأنه يعرف قيمة نفسه".

وقال: "آخر كوبليه في أغنية بلاش عتاب كمال الطويل رفض يلحنه، لأنه وقف التعاون معاه، فعبد الحليم جاب الملحن رؤوف زهري، ولحن الكوبليه التالت وسمع كمال الطويل، قاله حلو لكنه مش من نسيج العمل، وشافوا إن الحل أنهم يكملوا تلحينها".