كاملة أبو ذكرى فى ندوتها بمهرجان القاهرة: مابحبش أصنف نفسى كمخرجة سينما المرأة.. بتمنى أقدم عمل عن الراجل المقهور وفيلم عن فلسطين.. كان فى مشهد بملك وكتابة اتحذف من الرقابة ورجعوه.. وهذه أقرب شخصيات أعمالى لي

كاملة أبو ذكرى فى ندوة تكريمها

سارة صلاح - بهاء نبيل - وداد خميس - تصوير كريم عبد العزيز

الخميس، 17 نوفمبر 2022 05:43 م

تمنت المخرجة كاملة أبو ذكرى، فى بداية ندوتها التى أقيمت ضمن فعاليات مهرجان القاهرة السينمائى، وأدارها الناقد طارق الشناوى، أن تنافس العام القادم فى المهرجان بفيلم، قائلة:"يارب السنة الجاية أكون موجوده فى مهرجان القاهرة السينمائى بفيلم".

وقالت كاملة أبو ذكرى : "المخرج مش ساحر مش هيحط العصاية على راس الممثل هيمثل كويس، الموهبة بتاعته هي اللي بتحركني معاه ممكن أكون سبب اني اطلع المخزون اللي جواه".وتابعت: "حظي كان حلو اني اشتغلت مع فنانين كبار صادقين بيبقى خوفهم على شغلهم، كنا بنسند ضهر بعض في الشغل لاننا بنشتغل في ظروف صعبة وبنشتغل فوق ٢٠ ساعة، الممثل بيكون في حالة صعبة ولكن حالة الحب هي اللي بتحركنا احنا الاتنين، وأنا بقول ممكن السيناريو عظيم والاخراج هايل والموسيقى كويسة ولكن الممثل لو وحش كل دا مش هيظهر".

وأضافت خلال ندوة تكريمها: "السيناريو هو الأساس اللي بنطلع عليه كلنا ولكن اللي بيوصل للمشاهد هو إحساس الممثل والحاجات الباقية بتكمل احساسه، وأنا بشكر كل ممثل انا اشتغلت معاه وكل ممثلة حققوا احساسي أوالحاجات اللي عايزة أوصلها للمشاهد".

كما أوضحت أن مسلسل واحة الغروب كانت ترغب في تقديمه في شكل سينمائي، ولكن كان هناك صعوبة بالغة في تحمل تكلفة الإنتاج، قائلة: "مسلسل واحة الغروب انا شايفه انه لو كان فيلم كان هيبقى أحسن كتير".

أضافت :" أنا إنسانة مطلوب أحس بالراجل والست والطفل و حاولت أعمل حاجات غير قضايا المرأة زى فيلم ملك وكتابة البطل كان محمود حميدة، وفى مسلسل واحة الغروب البطل كان النجم خالد النبوى، ولكن سينما المرأة لذيذة وبتسفرك بره وبتأكلك عيش بس مش بحب أصنف نفسى أنى أقدم سينما المرأة".

وأردفت فى حديثها:" بتمنى أعمل حاجات كتير خاصة بالرجالة العيشة والحياة و الراجل اللى عاوز يعيش حر الراجل كمان مخنوق و محتاج حرية بشكل تانى وأتمنى أعمل حاجه خاصة بالراجل عاوزه اعمل عن الراجل المقهور كفاية كلام عن الست المقهورة".

وأكملت: "كنت بفضل اشتغل سنة وأقعد فى البيت سنة عشان بنتى وأبقى أم طبيعية عايشة معاها لأن الشغل بيبقى مخليك دائما بره البيت و مكنش ينفع معايا ده كأم والوقت اللى بستريح فيه بيخلينى اسافر أشوف صحابى اتفرج على الأفلام اعيش طبيعية لان أول ما بمضى عقد بيبقى انتهاء ليا كإنسانة طبيعية دائما ببقى عاوزه افصل واشحن".

كما أشارت المخرجة كاملة أبو ذكري خلال ندوة تكريمها أنها تحلم بعمل فيلم سينمائي عن فلسطين، قائلة: "بحلم طول عمري أعمل فيلم عن فلسطين ويكون اسمه فلسطين ويكون فيلم حقيقي مش مجرد فيلم مهرجان وفيلم يقول الحقيقة زي ما حصلت من غير تجميل يعرف الأجيال الجديدة اللي حصل بدون تزييف"

وتابعت: "أقرب شخصية شبهي هند في فيلم ملك وكتابة أنا مريت بالتجارب بتاعتها، وكان ليا مشهد في ملك وكتابة اتحذفت في الرقابة ورجعوه".

كما أشارت أن عينيها كانت تلمع في العمل مع المخرج عاطف الطيب قائلة: "عيني كانت بتلمع مع المخرج عاطف الطيب هو كان قليل الكلام ودائما مشغول بالحالة اللي فيها بس انا كنت بساله كتير لحد ما قالي ممكن متجيش اللوكيشن تاني هو اللي وصلني كلمة الصدق دي في العمل هو اللي وصلني لمعة القلب واتعلمت كتير مع كل الكرو اللي ورا الكاميرا".

كما تحدثت النجمة إلهام شاهين، عن كاملة، قائلة:"أعلى مستوى و أعلى تصوير و مسلسل بطلوع الروح عاملناها كفيلم كل حلقة فيلم لوحده وهى مبدعة و بشكرك بجد على جمالك و مهنيتك و ابداعك أنتى مخرجة مبدعة و متميزة وبفرح لما اشتغل مع كاملة و بسلمها نفسى و أنا مطمنة و ببقى سعيدة و أنا شغاله معاها ودائما كل الممثلين بيطلعوا معاها حاجة و مع مخرج أخر حاجة تانية كاملة عاملة طفرة فى السينما عاملت معاها فيلم واحد صفر خد 50 جائزة و فيلم يوم للستات 25 جائزة ومسلسل بطلوع الروح خدنا أكتر من جائزة كاملة مشرفة اسم الفن المصرى سواء فى الدراما أو فى السينما".