حسن الرداد: خضت مغامرة "تحت تهديد السلاح" لتجنب تكرار نفسى.. فيديو

تحدث الفنان حسن الرداد عن تنوع الأعمال السينمائية التى قدمها خلال الفترة الماضية ما بين الكوميدى والدرامى والرومانسى، قائلا: "حبيت أعمل نوع مختلف من الدراما، عايز أعمل كوميدى ورومانسى وأكشن ودراما تراجيدى، فبدأت أحط فى دماغى كدا، عشان مفضلش محصور فى حتة معينة".

وتابع خلال ندوته باليوم السابع: "عملت أول تجارب في السينما كوميدي وكان ليه قبول كبير عند الجمهور، السهل إنى أفضل فى المنطقة دى إنى أقدم كوميدى، أو كوميدى رومانسى، ودا كنت رافضه جدا، لأن فيه نجوم كتيرة بتحصر نفسها فى شكل أو أدوار معينة، مش بتعرف تغير بعد كدا أو الجمهور مش بيتقبلها، والجمهور كمان بيتغير".

كما أشار إلى أنه تعلم ذلك الأمر من الفنان الراحل نور الشريف، موضحا: "وأنا بحب أتفرج على لقاءات قديمة لنجوم السينما، وكنت مرة بتفرج على الفنان الكبير نور الشريف كان بيتكلم عن الكوميديا وإن الكوميديا للى بيعرف يعملها طابع بوسطة في أي وقت، لكن الفكرة إنك كفنان إزاي متسيبش نفسك هتلاقي مع الوقت مش عارف تخرج من النقطة دي، ودا اللي كنت حاطه في دماغي بحاول أعمله".

كما استكمل حديثه: "وفي السينما المصرية فكرة إنك تعمل فيلم رومانسي كأنك بتعمل فيلم حربي حاجة صعبة، فأنا كنت عايز أعمل كل الأنواع، وبعدها عملت فيلم "توأم روحي" لقيت الكل بدأ يبعتلى أفلام رومانسية وبدأ يجيلى روايات كتيرة، طب أنا لا مش هعمل رومانسى دلوقتى لأن إنك تفضل محصور فى حتة معينة سواء كوميدي أو رومانسي أو أكشن صعب على الممثل ولكنه صحي أكتر، ويخلي المتفرج يتقبلني في كل نوع".

يذكر أن حسن الرداد يعرض له خلال الفترة الحالية فى دور العرض السينمائية المختلفة فيلم "تحت تهديد السلاح"، الذى يشاركه بطولته كل من: مي عمر، شيرين رضا، عمرو عبد الجليل، بيومي فؤاد، عباس أبو الحسن، هلا السعيد، جورى بكر، أحمد بدير، وعدد آخر من الفنانين وضيف الشرف فتحي عبد الوهاب، ، من تأليف أيمن بهجت قمر، وإخراج محمد عبد الرحمن حماقى، وتدور أحداثه في إطار من الإثارة والتشويق حول جريمة قتل يتم اتهام فيها الرداد ويتم البحث عن ملابسات الجريمة.