الرئيس السيسى عن قانون الأحوال الشخصية الجديد: لجنة برئاسة قاض للموافقة على الزواج بشكل مميكن.. نطرحه للحوار المجتمعي قبل إقراره.. ويؤكد: الهدف من إجراءات وشروط الكشف الطبى الاطمئنان على الأسرة

** الرئيس السيسي: الدولة تشارك بالنصف فى صندوق الأسر بقانون الأحوال الشخصية

** الرئيس السيسي: يجب على الزوجين التفكير قبل الإنجاب والهدف ليس تنظيم النسل

تحدث الرئيس عبد الفتاح السيسي، خلال كلمته في افتتاح مشروعات قومية جديدة في محافظة الجيزة، عن قانون الأحوال الشخصية الجديد، قائلا: "لما اتكلمنا عن قانون الأحوال الشخصية قولنا شوية ملامح للقانون.. والنخبة اللى اشتغلت فيه مطمئنين أنهم خدوا كل وجهات النظر، وتم طرحها لأن الناس كانت بتشوف الكلام ده على منصة القضاء على مدى 30 سنة وأكثر".

وأضاف الرئيس السيسي: "لما اتكلمنا عن الملامح الرئيسية ده مش معناه أنكم ما تعملوش حسابكم في الحوار حوله.. لازم تعملوا حوار مجتمعي للقانون.. وزير العدل موجود معانا يكلمنا عن القانون الجديد".

وتحدث الرئيس السيسي، عن إنشاء صندوق جديد ضمن قانون الأحوال الشخصية الجديد، قائلا: "قولت النهارده نعمل صندوق.. جاي تتجوز حط مبلغ للصندوق.. ومش كبير أوي.. اللى يقدر على جواز يقدر يعمل ويشارك في الصندوق.. ولا تقعدوا تتخانقوا على الفرش والتكاليف.. لا ده مبلغ مش كتير.. وأنا كدولة اتفقت مع الدكتور مصطفي مدبولي.. نحط قد ما يجيب الصندوق.. مليار قصاده مليار.. مليارين هنحط مليارين.. تأمين أولادنا في كل شيء.. ده النقاش.. انتوا بتتكلموا عن نسبة طلاق".

أضاف الرئيس السيسي:"جبنا متخصصين من الجامعة وعلم النفس خلال إعداد مشروع القانون الجديد للأحوال الشخصية".

وداعب الرئيس السيسي وزير العدل: "عملنا المؤتمر الصحفي أهو لقانون الأحوال الشخصية الجديد للحديث عن ملامحه".

تابع الرئيس السيسي: "أكدنا على ضرورة أنه ما فيش تجربة شخصية تكون حالة عامة في القانون الجديدة للأحوال الشخصية.. إحنا بنعمل قانون الاستثناء للزواج والطلاق والخلاف أثناء الطلاق.. فيه أسر عندها قدرة تتجاوز الخلاف والأمور ماشية بسلام.. وأنت بتعمل قانون الاستثناء.. والحالة الواحدة اللى بتحصل لازم تتدرس لأنها مش ظاهرة".

تحدث الرئيس عبد الفتاح السيسي، عن إنشاء صندوق لدعم الأسرة ضمن مشروع قانون الأحوال الشخصية الجديد، قائلا: "ليه بنعمل الفكرة دي.. أنا بقول النهارده مش عاوزين أي أسرة والاختلاف وارد.. لما الاختلاف وارد فيه فترة زمنية وقت الاختلاف.. من يتكفل بالأبناء.. هما زعلانين ومش عاوزين يصرفوا.. طب مين اللى يصرف على الأولاد.. هل يضيع الأبناء؟!.. دول ولاد مصر.. صندوق دعم الأٍسرة في الأوقات الحرجة.. وقولنا الدعم الحكومى تساهم في بقدر ما يساهم فيه المتزوجين".

أضاف الرئيس السيسي: "أي إجراء بنعمله خالي بالكم.. أن الدين بيخاطب الضمائر له نظم.. والدولة لازم تعمل نظم تحقق مقاصد الدين.. يعني لما يجي يقولك إكرام اليتيم.. اكرموا اليتيم.. الدولة تأخذ اتجاه وتعمل قواعد وإجراءات لإكرام اليتيم.. أي إجراء يتم علشان الناس تفهم يعني أيه دين حقيقي.. مش فقط نخاطب ضمائر الناس.. الدولة مسئولة عن قواعد ونظم تحقق المقاصد الطيبة للدين".