شوبير: الأهلى بمن حضر مش فى المونديال.. وموسيمانى مش عارف يبطل تصريحات

انتقد الإعلامى أحمد شوبير التصريحات الأخيرة للجنوب أفريقى بيتسو موسيمانى المدير الفنى للنادى الأهلى بشأن عدم معرفته بقرار قطع إعارة محمد عبد المنعم مدافع المنتخب الوطنى من فيوتشر، وقال شوبير فى برنامجه الإذاعى عبر أون سبورت إف إم "كان نفسى موسيمانى يبطل تصريحات شوية، لأن مع كل تصريح ليه بيحصل انتقادات عنيفة سواء على السوشيال ميديا أو مننا كإعلاميين خاصة إن التصريحات غريبة".

ويضيف شوبير "الأهلى بقاله 15 يوم بيفاوض فيوتشر من أجل قطع إعارة محمد عبد المنعم وعودته للفريق وهذا بناء على طلب موسيمانى نفسه وهو اللى طلب من الإدارة كده يبقى إزاى يطلع يقول أنا معرفش إن اللاعب رجع".

وتابع شوبير "تصريح زى ده غريب وبيتفسر بطريقة خاطئة ومينفعش موسيمانى يقوله خالص خاصة إنه عارف وطالب عودة اللاعب وفيوتشر وافق احتراماً للأهلى وجماهيره".

وعن كأس العالم للأندية علق شوبير "الناس بتقول واثقين فى الأهلى والأهلى بمن حضر على عينى ورأسى كلنا بنحب الأهلى بس الكلمة دى متتقالش فى المونديال إنت رايح تلاعب أبطال قارات وانت فريقك أغلبه مش موجود بجد ، ومحدش يصدق فكرة إن فيه 11 لاعب هيغيبوا عن مونتيرى المكسيكى هو لاعب واحد بس وعنده رباط صليبى زى أكرم توفيق والباقى جاهز وزى الفل".

وتابع شوبير "سيد عبد الحفيظ أصر على عمل مسحات للفريق مرة ثانية فى القاهرة قبل السفر للإمارات خوفاً من إيجايبة أى مسحة لأن النظام فى الإمارات ينص على عزل أى مصاب بكورونا 14 يوماً وبالتالى سوف تتصعب مهمة الأهلى أكثر".