ملوك الجدعنة.. "محمد" فتح بيته فى روسيا لاستقبال المصريين على الحدود مجانًا

بدأ الغزو الروسى على أوكرانيا منذ أيام، وشعر الكثير من الأشخاص بالذعر على أشقائهم وأقاربهم المقيمون فى أوكرانيا، خوفًا عليهم من القصف، وبدأت الدول تطالب رعاياها بالعودة، ولكن واجه البعض من الراغبين فى العودة لبلادهم مشكلة فى الإقامة حتى يتثنى لهم حجز تذكرة الطيران والعودة لبلادهم، وهنا ظهرت جدعنة وشهامة المصريين مع بعضهم البعض وأشقائهم العرب فى الغربة، وكان من بينهم محمد العيسوى، المصرى المقيم بروسيا، والذى أعلن عن استعداده لاستقبال المصريين فى منزله مجانًا.

العيسوى: أنا أول من نادى بمبادرة استقبال المصريين

قال محمد العيسوى، وهو مصرى مقيم فى روسيا منذ 16 عامًا، ويمتلك شركة سياحة، لـ"اليوم السابع": "الفكرة جاتلى من يومين  لما عرفت مبادرة وزارة السياحة باستقبال السياح الأوكرانيين العالقين فى الفنادق، وقولت ليه المصريين اللى عايشين فى روسيا والبلاد المجاورة لأوكرانيا مايستقبلوش المصريين اللى فى أوكرانيا فى بيوتهم ، فقررت أدعو المصريين اللى على الحدود لاستقبالهم فى منزلى وطبعاً فيه مصريين كتير كلمونى، لكن عندهم مشكلة فى الانتقال".

أضاف: "أنا أول واحد اقترحت الفكرة على مواقع التواصل الاجتماعى، وشجعت كتير من المصريين، إنهم ياخدوا نفس المبادرة، وأنا عندى بيتين فى روسيا وهوفر لهم الأكل والشرب مجاناً، وناوى استقبل الطلبة المصريين لأنهم شباب صغيرين مرعوبين وفيه منهم مش بيعرف يتكلم روسى أو أوكرانى ولازم نساعدهم ونوقف جنبهم واحسسهم بالأمان، ونفسى المصريين اللى فى روسيا خاصة الطلبة يحسوا بالأمان ويكملوا دراستهم لأن إن شاء الله مفيش حاجة هتحصل فى روسيا فلازم يطمنوا ".

وعن رد فعل المصريين العالقين على حدود أوكرانيا، قال محمد:"الناس تواصلت معايا عن طريق الماسينجر والواتس أب ومكالمات تليفونية وفيه منهم ناويين يوصلوا روسيا بس فيه مشكلة فى الانتقالات وأنا قولت للناس أى حد يوصل روسيا يقولى وأنا هستقبله أو حد من المكتب يستقبله، وهفضل معاه لحد ما يوصل للمطار ويرجع مصر، واللى هقدر استقبلهم هما 8 أو 10 أشخاص بالكتير أوى، عشان يكونوا مرتاحين فى البيت".

محمد العيسوى

صورة من منزل العيسوى

صورة من المنزل

صورة أخرى