سألنا البنات.. ممكن تقبلى تاكلى فى طبق فوم بعزومة ولا تعتبريها قلة قيمة؟

تحرص المرأة عند التحضير لأى عزومة على تجهيز أشهى الأطعمة والعصائر التى تنوى تقديمها للمدعوين، حتى تظهر الوليمة فى أجمل صورة ممكنة ومشرفة لها، ولكن بعض النساء يفضلن تقديم الأطعمة على أطباق "فوم" وملاعق بلاستيك حتى توفر على نفسها الشعور بالتعب والإرهاق عند تنظيف الصحون، ولكن هذه الطريقة المتبعة اعتبرها البعض بمثابة تقليل من شأن المدعوين لتناول الطعام أو إنها تلميح لهم بالخوف من إنتقال العدوى لأفراد الأسرة من خلالهم، ومن ناحية أخرى اعتبرها البعض فكرة مكلفة مادياً، ولهذا سألنا الشباب: هل تقديم الطعام فى العزومات على أطباق فوم قلة قيمة ولا فكرة صحية؟ وكان الرد كالآتى:

هل تقديم الطعام فى العزومات على أطباق فوم قلة قيمة ولا فكرة صحية؟ 
 

مش هتنقل عدوى

 قالت منال محمد بمرحلة العشرينات :" أنا مع فكرة استخدام أطباق الفوم، لأسباب كثيرة منها أنها تستخدم مرة واحدة وبالتالى هتساعد على عدم انتشار العدوى، وتوفر وقتا ومش هتعمل زحمة في المطبخ ولا أزمة فى المواعين".

فكرة مبهرة ومريحة

وأضافت أسماء عمارة: أنا كنت عاملة عزومة لـ 12 فردا من حوالى أسبوع، وقدمت الأكل فى أطباق فوم، لكن زوجي اعترض وقالى هو إحنا  في مستشفي  وبعدين انتي عروسة جديدة فين أطباقك، لكن أنا شايفة أن الموضوع  مالوش علاقة، أنا عندي ولا معنديش أطباق، قد ماهو مريح نفسياَ، وكمان مفيش مواعين هضطر أغسلها، وكمان دى فكرة كويسة هتحمينى من عدوى كورونا اللى ممكن تتنقل من خلال الأطباق ".

فكرة شيك ورحمة من المواعين

وأضافت سمر وهى بمرحلة الثلاثينات من عمرها":  أنا كنت معزومة أنا وأختي  واتقدملنا الأكل في أطباق من الفوم وكان شكلها تحفة في الأول وأخدت الموضوع هزار وقولتهم إحنا مفيش عندنا كورونا يا جماعة ولكن فكرت فيها بعدين وحسيت فعلاً إنها طريقة مريحة وشيك لتقديم الأكل، ورحمة من كسرة الضهر وقت تحضير الأكل وتقديمه".

وأضافت ألاء:" بصراحة أحلى فكرة ويارب الكل ينفذها بعيدًا عن كورونا  أو أي حاجة هي فكرة حلوة جدًا وغير مكلفة بالمرة و بصراحة عندى استعداد أدفع مليون جنيه ولا أغسل مواعين  بعد عزومة، أنا بكسل أغسل الطبق اللي باكل فيه".

فكرة مرفوضة

ورغم تأييد البعض للفكرة، إلا إنها هناك معارضات مثل أسماء أحمد، التى قالت :" استحالة أعمل كده وأقدم أكل فى أطباق فوم، أنا لازم أفتح النيش فى العزومات وأعرفهم إني صارفة ومكلفة وبصراحة لو اتقدملي  أكل فى طبق فوم هكون زعلانة وأحس بعدم تقدير".