متصلة لقناة الحياة: لقيت سحر فى دولابى.. ورمضان عبد الرازق ينصحها بالحل

تلقي برنامج "الدنيا بخير"، والذى يعرض على قناة الحياة، سؤالا إلى الشيخ رمضان عبد الرازق من علماء الأزهر الشريف، وذلك من أحد متابعات البرنامج، تقول فيه: "انا بصلي بس كنت بقطع فى الصلاة.. وكنت بتعب واروح للدكاترة.. ومكنشى فيه حاجة.. وكنت بعاني من أمراض مختلفة وكان فيه خناقات.. وعيالي الصغيرين بضرهم وأنا مش حاسة.. ومكنتش مستحملة ومش طايقة نفسي".

وأضافت المتصلة، خلال المداخلة مع البرنامج: "وفى شهر رمضان اللى فات ربنا هداني وسمعت الدكتور رمضان.. والتزمت فى الصلاة والسنن.. وقراءة سورة البقرة يوميا.. وحفظتها الحمد لله.. وبعد ما حفظتها بأسبوع.. جوزي بيدور فى الدولاب.. لقي سحر فى الدولاب معمولي كتير بحاجات مش كويسة.. ومش عارفة جت ازاى.. ولقيت مع الورق فحم وتراب.. ورفضت أروح لحد وكملت على قراءة البقرة واتحسنت.. وكان قلبي بيوجعني.. ومش قادرة أقوم.. وكنت بتعصب على ولادي.. ومش طايقة حد من أهلى وأسرتي.. وتعب مستمر والأطباء قالوا مفيش حاجة.. والحمد لله لقيت الورق ده.. ودلوقتي التعب ده رجع عليا وأنا مش عاوزة أورح لحد.. وإيه العلاج؟".

من جانبه، رد الشيخ رمضان عبد الرازق على سؤال المتصلة قائلا: "أنا مؤمن برحمة الله وحده وستره ونصره.. أنا معايا ربنا ومعايا كتابه.. وأنا مش محتاج حد.. متروحيش لحد.. معاكى القرآن الكريم.. هو العلاج.. وسيدنا النبي عليه الصلاة والسلام قال لنا فى الحديث الصحيح.. عليكم بسورة البقرة"، مطالبا بتكرار تلاوة سورة البقرة، ومستشهدا بحديث الرسول: "عليكم بسورة البقرة.. فإن أخذها بركة"، حيث أنها بركة فى الصحة والأولاد والعمر والبيت والمال، وسورة البقرة تركها حسرة.

وتابع الشيخ رمضان عبد الرازق: "سورة البقرة تبطل أى سحر.. لا الدجالين بيتحكموا.. ودى أوهام فقط.. وهو لا يملك أى شئ.. السحر ليس له حقيقة.. أوهام وتخيلات.. عليكي بأذكار الصباح والمساء.. الحفاظ على الصلاة فى أوقاتها.. وقراءة سورة البقرة.. المداومة على ذكر الله وتلاوة سورة البقرة.. والصلاة على النبي.. والاستغفار.. ومحدش هيقدر يقربلك".