أمينة شلباية تفتح قلبها فى أجرأ لقاء مع تامر إسماعيل: أنا ست قوية وماينفعش معايا سى السيد.. عمرى ما قلت إنى أحلى واحدة فى مصر.. اللبس عندنا كارثة ومش عارفة ليه المحجبات بيلبسوا ضيق.. والطبخ للبنت أهم من المكياج

في ظهور لم يخل من الجرأة والصراحة، تحدثت الإعلامية أمينة شلباية، ملكة جمال مصر عام 1988، وأشهر ملكات الجمال الذين مثلوا مصر عالميا، وفتحت قلبها بكثير من الأسرار والحكايات في مشوارها في عالم الإعلام والموضة والجمال.

كشفت أمينة شلباية خلال لقاءها ببرنامج "أهلا بيك" مع تامر إسماعيل على تليفزيون اليوم السابع، أن سر الهجوم عليها بعد فوزها بمسابقة ملكة جمال مصر كان وجود ابنة أخت الفنانة رغدة بين المتسابقات، وكان الجميع وقتها يرشحها للفوز، لكن فوز أمينة شلباية، حسب حديثها، أصاب الجميع بالتوتر وجعل الصحافة والإعلام يهاجمونها دون سبب ترضية للفنانة رغدة.

صورة من اللقاء

وأضافت: "هاجمونى لدرجة إنهم قالوا إن أبويا قدم رشوة للحكام، رغم إن والدى أصلا متوفى، ومكنتش عارفة ليه بيعملوا كده، وأنا أصلا مكنش هدفى أكسب ولا حاجة، لكن اختيار اللجنة ليها عوامل كتير مش بس الشكل، وأنا قدرت أحصد اللقب".

وتابعت أمينة شلباية فيما يخص حياتها الأسرية: "أنا تزوجت مرتين، الأولى استمرت لمدة عام، والثانية أنجبت منها أبنائى وهم كل حياتى، لكن أنا بالنسبالى مقدرش أسيب شغلى وطموحى عشان حد، والراجل في مصر مش بيحب الست القوية الناجحة، وأنا مينفعش معايا سى السيد".

وعن اللبس في المجتمع المصرى قالت: "بصراحة اللبس في مصر كارثة، والناس بتلبس غلط، حتى المذيعين والمشاهير، ومش عارفة ليه المحجبات كمان بيلبسوا ضيق أوى كده، الحجاب مش مجرد طرحة، وطالما اتحجبت لازم أغير دولابى".

أمينة شلباية خلال اللقاء

وقالت شلباية ردا على أسئلة تامر إسماعيل: "الطبخ بالنسبالى أهم للبنت من الماكياج والرقص، والست المصرية عيبها إنها لتاتة ورغاية وبتنفسن، والراجل المصرى عيبه شكليا كرشه، لكن الست المصرية أشيك وأجمل من أي جنسية تانية بشرط إنها تاخد بالها من نفسها".