"راجل و2 ستات" يناقش ظاهرة الزواج من رجل وسيم.. شريهان أبو الحسن عن الزواج من رجل وسيم: الحياة الأسرية ومؤسسة الزواج حكاية تانية.. هيدى كرم: الست لو مرتبطة براجل وسيم ومش واثقة من نفسها هيسبب ضغط نفسى خطير

ناقش برنامج راجل و2 ستات المذاع على قناة on، تقديم الإعلامية شريهان أبو الحسن والفنانة هيدى كرم، ظاهرة اشتراط الزواج من رجل وسيم، وقالت الإعلامية شريهان أبو الحسن: "البنات الصغيرة فى السن تختار شريك حياتها وفق معيار الوسامة، والحقيقة بضرب لهم مثل على نجوم هوليوود، الرجالة قمرات وصواريخ ويجننوا ومنهم براد بيت وتوم كروز مفيش واحد فيهم عمّر فى جوازة، وكانوا متزوجين جميلات، ومع ذلك الحياة الأسرية مكملتش".

وأضافت شريهان أبو الحسن: "النجوم عندهم شهرة ونجومية ومال وكل حاجة ولكن الحقيقة الزواج حكاية تانية، وأن الشخص يبقى زوج وحبيب وأب قصة أخرى، والجمال وقتها مش بينفع". وتابعت: "امتى يبقى فيه جحيم لما هو يكون الوسيم حاسس بنفسه وشايف نفسه".

وعلقت الفنانة هيدى كرم قائلة: "لما يكون حاسس الراجل بكدة يبقى الجحيم نفسه وتقهر المرأة، والدراسات النفسية تقول الست عندها استعداد تسامح الراجل الوسيم أكتر بكتير من الراجل الأقل وسامة، ولو عمل نفس الخطأ اللى عمله الراجل الأقل وسامة الوسيم يستامح عادى ويتنسى عادى، فاحنا بنبلع للراجل الوسيم حاجات كتير قوى بتخليه يحس بنفسه أكتر فى العلاقة".

وقالت الإعلامية شريهان أبو الحسن: "الست اللى متجوزة راجل وسيم وواخد باله من نفسه بشوفها مش ست محظوظة، لأن الست قليلة الجمال عند الزواج من رجل وسيم نظرة الناس ليها دائما مستكترينه عليها ويقولوا جملة: (إيه اللى عاجبه فيها، واختارها ليه)، وأهو تلاقيها هى متعلمة أحسن منه وأهلها معاهم فلوس".

وأضافت: "الست اللى متجوزة رجل وسيم تلاقى الناس يقولوا عليها عاملة له عمل عشان يتجوزها، وطبيعى إن الست تكون جميلة عن الرجل عشان الست تبروز نفسها أمام الناس، والست اللى بتجوز رجل وسيم وواثقة فى نفسها بيعطى جمال للمرأة أكثر".

وعلقت الفنانة هيدى كرم قائلة: "هناك رجالة تقول إنها مش بتريد الزواج بسيدة جميلة قوى لأنه بتعمل لهم مشاكل ومنها تكون ملفتة فى أى مكان وغيبة وحاجات كتير، والعكس لو الست مرتبطة براجل وسيم ولو هى مش واثقة من نفسها يمكن يعمل عليها ضغط نفسى خطير جدا".

وتابعت: "هناك رجل وسيم يتزوج بسيدة قليلة الجمال ولكن بنظره شايفها أجمل واحدة فى الكون زى ما فيه ست جميلة تتزوج رجل متواضع شكليا لكن هى بتحبه جدا وشايفاه أحلى راجل فى الدنيا".

وقال الإعلامى سيف زاهر: "الإعلام الرياضى زمان كان يصحى من النوم ويعمل اللى هو عاوزه أهلاوى ماشى زمالكاوى ماشى وده منتقد قوى، ولكن كل الإعلام الرياضى حاليا فى منظومة مصر الجديدة يعنى لا يوجد إعلامى رياضى يتكلم مع نفسه وكله ماشى فى إطار واحد".

وأضاف خلال حواره ببرنامج راجل و2 ستات المذاع على قناة on، تقديم الإعلامية شريهان أبو الحسن والفنانة هيدى كرم: "لدينا خريطة أو كود نسير عليه ألا وهى العدالة والحيادية، والجميع فى طريق واحد، ولو تم انتقاد واحد لا بد من إدخال الطرف التى تنتقده يرد على الانتقاد عليه". 

وتابع سيف زاهر: "أنا أهلاوى، ولكن الحيادية على الشاشة لا بد منها، ولدينا معيار فى المجال الرياضى أنه لو كل الناس تعترض عليك يبقى كده الشخص فى طريق النجاح".