شوبير ناصحا رمضان صبحى: حط قطن فى ودنك

وجه الإعلامى أحمد شوبير نصيحة لرمضان صبحى لاعب بيراميدز بأن يستعيد تركيزه سريعاً ويغلق أذنه تجاه هتافات الجماهير، قائلا فى برنامجه الإذاعى عبر أون سبورت إف إم "مباراة حلوة أوى من الأهلى وبيراميدز أمس، بس طلبت من المراسلين فى الملعب يقولولى تصرفات الرباعى شريف إكرامى ورمضان صبحى وعبد الله السعيد وأحمد فتحى تجاه هتافات جماهير الأهلى".

وتابع شوبير "على فكرة جمهور الأهلى لم يتلفظ بألفاظ خارجة ومحدش يقدر يمسك عليه غلطة، هما هتفوا عن الطموح والفلوس وكلام عادى، المراسلين قالولى إن شريف إكرامى أشار لجمهور الاهلى أنهم على رأسه عقب الهتاف فقررت جماهير الأهلى التوقف عن الهتاف، بينما لم يتأثر عبد الله السعيد واللى بيقول إن مستواه تراجع بقولهم عبد الله السعيد لعب كويس باستثناء غلطة الهدف الأول، وليه كورة فى العارضة بس هو مستواه مبقاش مثلا زى الموسم اللى فات واللى قبله والمستوى عالطول فى النازل وده طبيعى عشان السن".

ويضيف شوبير "أما أحمد فتحى فحرص على الذهاب إلى دكة الأهلى وصافح زملاءه السابقين وكذلك سيد عبد الحفيظ، بينما رمضان صبحى ظهر عصبياً أكثر من اللازم، ولازم رمضان يحط قطن فى ودنه عشان يرجع يركز عشان مستواه أقل ومبقاش أساسى فى المنتخب، وأهدافه قلت وصناعته للأهداف قلت ولازم يركز ويستعيد مستواه لازم يفكر فى نفسه ويعرف يرجعها تانى".

وأكمل شوبير "أما نصيحتى لمحمد شريف بقوله أتدرب على ركلات الجزاء هى اللى نقصاك عشان إنت سجلت أربع أهداف فى الدورى وهتسجل كتير وهتنافس على لقب هداف الدورى اللى فوزت بيه الموسم اللى فات، وهتحتاج تسجل ركلات الجزاء عشان ترفع رصيدك من الأهداف".

وعن الأهلى علق شوبير "موسيمانى رايح جنوب أفريقيا عشان يرجع بالفوز على صن دوانز أو على أقصى تقدير التعادل لضمان التأهل للدور التالى، ومش هيعمل تغيير فى التشكيل إلا لو تأكد غياب محمد هانى وقتها ممكن يزود المدافعين".