هات العصاية يا ولد.. مين هو صاحب صوت عم شكشك وباباه فى بوجى وطمطم (فيديو)

"هات العصاية يا ولد.. وفوت علينا بكرة يا سيد"، جمل لن ننساها مهما مرت السنين، وقد ارتبطت بعم شكشك ووالده فى مسلسل بوجى وطمطم، وهو صاحب هذه الجمل الشهيرة فى المسلسل، فكان عم شكشك هو الأب الكبير فى المسلسل وصاحب النصيحة دائما.

وفى برنامج دوبلاج يقدم اليوم السابع أسرار وحكايات مسلسل بوجى وطمطم، من واحد من الفنانيين الكبار الذين أبدعوا فى الأداء الصوتى للشخصيات الكرتونية وهو الفنان رضا الجمال صاحب صوت والد عم شكشك وصوت الطباخ وصوت عم شكشك بعد وفاة الفنان رأفت فهيم الذى قام باداء صوت عم شكشك في المواسم الأولى في مسلسل بوجى وطمطم.

قال الفنان رضا الجمال لـ اليوم السابع" لما بيقولولى نحكى عن الماضى وذكريات بوجى وطمطم  بزعل جدا لأن انا مش بعتبر بوجى وطمطم ذكرى وخلاص لكن بتبلغنى السعادة لما بنتكلم عنه وهو لسه موجود وسطنا وبفرح لما بلاقى رجالة وبنات كبار اتربوا على بوجى وطمطم ولسه بيتكلموا عليه".

وأضاف: "رحمى الله يرحمه فنان مبدع وجميل جدا، اتقابلنا كتير، وخصوصا وانا ف بداية مشوارى لما كنت شاب صغير كنت بعمل مسرحية انقلاب وكان معايا نيلى وايمان البحر درويش وحسن كامى وحسن الأسمر، فانا كنت بعمل دور والد نيلى رغم انى صغير ، ولما رحمى شافنى قالى  ايه رايك فى بوجى وطمطم قلتله انا بحبه جدا  قالى تبقى معايا فيه قلتله هعمل ايه قالى حبيبك رافت فهيم شكشك تيجى انت بقى تعمل ابو عم شكشك انا بفكر اطلعله أب قلتله يشرفنى جدا وفعلا عملت الصوت ونجح جدا ".

وتابع "بعدها رافت فهيم تعب جدا وكانوا بيدوروا على حد يعمل صوت عم شكشك من بعد رأفت فهيم  فقرر رحمى إن انا اللى اعمل عم شكشك كمان ومن هنا عملت الصوتين مع بعض عم شكشك وبباه وعملت صوت الطباخ اللى فى المسلسل".

واستطرد حديثه قائلا"كنت بعمل التلت شخصيات مع بعض فى نفس الوقت ، وكانت ايام جميلة وذكريات أجمل فى بوجى وطمطم ، ونفسى نهتم بالاطفال زى ماحنا بنهتم بالشباب دلوقتى فى الأعمال الدرامية".