حنان ماضى: "أم كلثوم ادتنى 5 جنيهات.. وخدتنى فى حضنها وهى بتغنى فى بروفة"

قالت الفنانة حنان ماضى، أنها حصلت على "5 جنيهات"، من كوكب الشرق الفنانة الراحلة أم كثلوم، متابعة: "بابا خدنى معاه في بروفة تخص أم كلثوم.. في ستديو 46 في الإذاعة.. وبعد ما دخلنا فتحت البيانو لحد لما الست أم كلثوم تيجي.. هي داخلة قفلوا البيانو عليا وعلى صوابعي.. روحت مضايقة اوي ازاى تقفلوا البيانو.. وجت سلمت عليا وخلتنى اقعد جنبها".

وأضافت خلال حوارها في برنامج "كلام الناس"، الذى تقدمه الإعلامية ياسمين عز على قناة "ام بي سي مصر": "واحنا في البروفة والسيدة أم كلثوم بتغني عادي.. فجأة الدنيا ظلمت.. انا اتفزعت.. وهى حست بيا وراحت وخدانى في حضنها وهى بتغنى.. هي قاعدة تغنى وأنا مرعوبة.. غنى زى ما تغني وأنا مرعوبة ومكنتش شايفة كف أيدي أصلا".

وتابعت الفنانة حنان ماضى: "بعد كده قاعدين في البروفة.. والنور مقطوع.. ولما الكهرباء رجعت قعدت تطبطب عليا وتضحك.. وقالتلى برافو عليك وانتى مخوفتيش.. وراحت مطلعة فلوس وادتهلى.. الحمد لله كانت حاجة لذيذة اوي".